11 May 2019 12:42

inkhel

Champion lai Hunthar Semifinal lut

Suzuki Gixxer Pro Volleyball League May ni 10, Zirtawpni zan inkhelah champion lai Hunthar chuan 3-2 in Tuichangral an hneh. Hunthar hian match ruk atangin point 17 an nei tawh a,  table-ah pahnihna an ni mek.

May ni 11, Inrinni zan dar 8:00-ah Durtlang North leh Chhinga Veng an in hmachhawn ang. 

May 13 & 14, thawhtanni leh thawhlehni zan dar 8 ve ve mipa senior semifinal khelh a ni ang a, dar 6-ah ve ve junior semifinal khelh a ni dawn a, LPS-in live telecast-in a pe chhuak ve ang

Champion lai Hunthar Vengin an mamawh point an hlawh chhuak a, 15-12, 15-6, 14-16, 15-12, 11-15 in Tuichangral an hneh a, semifinal hmun ruak hnuhnung ber an hnawh khat.

Chawnpui Sports Centre-ah Huntharin tlang turin set hnih an mamawh a, set hmasa pahnihah an puitlin nghal. Mahse, set thumna an hloh hnuah hnehna chang theiin set linaah an inlan leh a, league khelh rukah vawi li chakin pahnihnaah an inhlangkai.

Deepesh Kumar Sinha chuan hmun pawimawh tak a luah leh a, set li a khelh chhungin Hunthar tan point 27 hmuin point 10 a hloh va, a vawi li nan RS Traders Player of the Night-a thlan a ni.

Vawi thum champion zawn thei turin Huntharin knockout round an lut a, nikuma final lut Tuichangral erawh parukna ni chungin an tla. Khaw chhak team hian tlang turin set li an mamawh laiin Hunthar lamah set hnih bakh an hlawh chhuak zo lo.

Huntharin a tir atangin inkhel an thunun zawk a, set hmasa berah hmahruaitu ni tluanin lehlamin Deepesh an dang thei lo. Tuichangral tan Jaideep Sandu leh Lalhmunmawia'n vaw tla fo mah se an chhang let hneh lova point 12-ah an tawp.

Khaw chhak team tan set hloh a thiang tawh lo va, mahse, Huntharin set hnihna an awpbet hneh leh zual. Deepesh bakah Ramenga'n fel fai takin a vaw tla a, Tuichangral an bet a, ho taka point hloh an neih nual bawk avangin team boruak a chhhiat phah.

An mamawh set hnih an lak zawn hnuin Huntharin 14-10 in hma an hruai zui leh. Mahse, an insawrbingna hlohvin Tuichangralin an pawtthla a, Jaideep chuan team fuih phurin point thum a hmu zawn. Hunthar rinrawl Deepesh talbuai telin point thum a hloh zawn ve bawk a, point ruk hmu zawnin Tuichangral an tlang.

Set linaah inhnehtawk takin an inkhel zui a, 11-11 thlengin point an inhmuh chhawk. Boruak sangah Hunthar an hriam zawk a, Tuichangralin awmze neia ball vawrh an harsat laiin Deepesh chuan hun tha neiin team a chakpui.

Set thum an lak rualin Huntharin an dinhmun an sawhnghet a, he inkhela hnehna changtu an ni chiang nghal bawk. Deepesh leh an chakna hnar pawimawh setter Remsangzuala awltirin set hnuhnung berah player naupang zawk tan hmun an siamsak.

Tuichangralin set ngana tir lamah Jaideep an thlak ve bawk a, Mizo hlang ve vein an inbei. Lalrinchhana'n khaw chhak team tanpuiin inkhel awmze nei thui tawh lo takah Hunthar dangin Tuichangralin an inkhelh hnuhnun berah set hnuhnung ber an la.

Jaideep chuan point 15 hmuin vawi ruk a tisual a, a khelh chhungin Tuichangral innghahna ni mah se semifinal lut khawpin a tanpui zo lo. Hmunmawia (hmuh 7, hloh 2), Malsawmsanga (hmuh 6, hloh 3) leh Rinchhana (hmuh 6, hloh 4) te an intluk tlang hle.

Hunthar lamah Deepesh thlawp thei ber Ramengmawia'n vawi ruk vaw tlain tum khat a tihsual a, setter Remsangzuala'n set li a khelh chhungin point li hmuin point khat a hloh. Lalremsanga (hmuh 4, hloh 2) leh Lalrinhlua (hmuh 4, hloh 3) ten mumal takin khelhna hmun an chang bawk.

TABLE 

1. Chhinga Veng Spikers - play 5, point 18

2. Hunthar Veng - play 6, point 17

3. Durtlang North - play 5, point 16

4. Anastasia Electric Veng - play 6, point 16

5. Chanmari West - play 6, point 13

6. Tuichangral - play 6, point 13

7. Thutak Nunpuitu Team - play 6, point 7

 

(adsbygoogle = window.adsbygoogle || []).push({});