Chelsea chuan an manager Thomas Tuchel-a hnuaia an game hmasa berah Wolves chu Stamford Bridge-ah an lo mikhuala, goal awm lovin team hnihte hi an inhnehtawk.
Khelh 20-ah Chelsea hian point 30 hlawhchhuak tawhin pariatnaah an awma, Wolves hian khelh 20-ah point 23 neiin, 13-naah an awm ve mek bawk.
Chelsea hian tunkar khan Lampard banin, Thawhlehni zan mai khan Tuchel hi an la luta, Tuchel hian a player tharte hi training vawi khat bak a la neihpui hman lo.
Chelsea 0-0 Wolves
Player Ratings
Chelsea: Mendy 6, Azpilicueta 6, Thiago Silva 6, Rudiger 5, Hudson-Odoi 6, Kovacic 5, Jorginho 5, Chilwell 5, Havertz 5, Ziyech 4, Giroud 4. Subs: Pulisic 6, Abraham 6, Mount 6.
Wolves: Rui Patricio 6, Boly 6, Coady 6, Kilman 6, Semedo 6, Dendoncker 5, Neves 5, Ait-Nouri 5, Traore 3, Podence 5, Neto 6. Subs: Hoever 6, Jose 5, Moutinho 6.
Tuchel-a hnuaiah Chelsea line-up leh formation an danglam nghala, 3-4-3 formation hmangin, Tuchel hian Frank Lampard-a hnuaia khel rim thin em em Mason Mount chu bench lamah a dah bawk.
Tuchel hian Edouard Mendy chu si ban nghah turin, tlar hnung pathumahh captain Cesar Azpilicueta, Thiago Silva leh Antonio Rudiger te dahin, wing back-ah Callum Hudson-Odoi leh Ben Chilwell te an awm. Midfield-ah Jorginho leh Matteo Kovacic te awmin, tlarhma pathumah Kai Havertz, Olivier Giroud leh Hakim Ziyech-te dah an ni.
Chelsea-in ball an chang tamin, an in pass nasa hle a, inkhel thunun zawk ni mahse chance tha erawh an ngah lem lova, Wolves defence an su pawp hleithei lo. Chelsea hian minute nga vel khelh a nihin chance an nei nghala, Hudson-Odoi chuan dinglamah ball khalhin, tha zetin ball cross mahse lo khawih thei an awm lo.
40mins chho ah Wolves hian chance an neia, veilamah Podence chuan chak taka ball khalhin, a cross-a, Dendoncker chuan lo tauh mahse a sang hreta goal kick turin a out. Darkar khat chuang khelh a nihin Chelsea hi Wolves box bul dinglamah ball an inpe kuala, Ziyech chuan a ke dinglamin goal bula awm Giroud pe mahse, French striker hian goal-ah a lo chan tir thei lo.
70mins-ah Wolves-in hma an hruai teuh hle a, Chelsea an nawr thuta, Podence leh Neto te chu ball inpe in, Neto hian box chhung atangin Chelsea goalkeeper Mendy a chip khuma, mahse chip na hretin cross bar chunglam a fuha, goal kick turin a out.
81mins-ah Chelsea hian goal an khung teuh hle a, Pulisic chuan dinglamah ball khalhin, Wolves box pawn chiah dinglam atangin Pulisic hian Ziyech a pe leta, Ziyech hian box pawn rawn tlann Kovacic-a tan ball lo dah remin, Kovacic hian a shoot nghala, goal teuh hle mahse goal a zawn tawk lo hret.
Kovacic-a chance neih atanga minute li hnu velah Hudson-Odoi chuan veilam atangin Wolves box chhungah ball a cut lut, shoot zuiin, Wolves defender-in a lo khawih a, goal teuh viau mahse Rui Patricio chuan a lo save.
Chelsea-in chance an nei zui leha, Mount chu Wolves box chhungah through ball pek niin, Mount hian goal hmazawn lamah ball pe pheiin, Boly chuan a lo clear. Inkhel tawp thlengin goal a lut lova, 0-0 a tawpin team hnihte’n point 1 ve ve an hlawhchhuak a ni.