Manchester United manager Ole Gunnar Solskjaer chuan an supporter-te nilo zawng chuan United chuan hlawhtling lo turin an duh vek thu a sawi.

United hian tun hma an phak tawh loh zia chu sawi tam ngai a ni tawh lova, Sir Alex Ferguson-a’n a enkawl lai kha chuan season tinin champion tura rin ber an ni ziah ti ila kan sawi sual tam lovang.

Tunah erawh Champions League pawh an khel pha ta lo zeuh zeuha, Sir Alex-a awm loh hnuah ngai an la awh thei meuh lo. Sir Alex-a player enkawl thin Solskjaer-a enkawlna hnuaiah United hian insiam that an tum mek a, season thar atan player pawh in lalut nual tawhin a dang pawh an la lakluh a rinawm.

Solskjaer chuan, “Tu pawh mai hian chik takin United hi chu min en bik a, mahse chu chu United kan nih chuan thil nih dan tur ve reng a ni. Sir Alex-a hnuaiah United pahnihna an nih khan sawisel an tawk nasa hle a, keipawhin khami pressure kha ka hmachhawn thei a ni.

“Kan fan-te tih loh hi chuan tu pawh hian hlawhchham turin min duh. Mahse heng zawng zawng hi kan ngaihsak loh a ngai a, player te hi inlungrual taka an awm phawt chuan season hmasa aiin hma kan sawn ngei dawn a ni,” a ti.

United hi season liamta khan Jose Mourinho hnuaiah an che chhe hle a, nikum December thlaah Mourinho banin Solskjaer hi an lalut. Solskjaer-a hnuaia che tha nghalin beisei sang thar hle a mahse a hnuah a ngai te bawkin hniam lam an pan leha, paruknaah awmin season tharah Champions League an khel dawn lo a ni.