​Tu pawh an la champion thei – Pep

09th December 2018, 03:12PM

Manchester City chuan hmahruaitu an nihna an hlohva, Chelsea lakah an tlawm avangin Liverpool chuan leh pelin, City hi pahnihnaah an awm mek.

City hian season liamta khan hneh takin Premier League title an la a, tun season-ah pawh Premier League-ah che tha hle in, inrinni zana Chelsea an hneh loh bak chu tlawm an la nei lo. Tun season-ah an kal tluang leh hle a, an champion leh mai pawh a rinawm ber laiin, manager Pep Guardiola chuan tu pawh an la champion thei tih a sawi.

Pep chuan, “December thlaah kan la awm chauhva, Liverpool hi an la champion theih leh theih loh min zawh chuan, an la champion thei tiin ka chhang ang che u. Tun dinhmunah hian Tottenham, Chelsea emaw Arsenal an la champion thei em tih min zawh chuan, an la champion thei tih bawkin ka chhang ang che u. Tu pawh hi an la champion thei a ni.

Pep Guardiola chuan Arsenal anga ‘Invincibles’ an nih ve dawn loh thu chungchang sawi belhin, “Tu pawhin ‘invincibles’ team kan nih dawn leh dawn loh min zawt fo. Season liamta pawh khan tun ang tho hian thil a thleng. ‘Invincibles’ kan ni dawn lo tih hi ka sawi fo thin. Chelsea kan hmachhawn hma pawhin press conference-ah hemi chungchang hi zawh ka ni leha, chhanna ngai bawk ka pe.

“’Invincbles’ ni turin he hmunah hian kan tel lova, champion tura tel kan ni a, kan elpuite aia point hmuh tam zawk hi kan tum ber chu a nimai. Inelnaah chuan chak loh chang a awm tur a ni a, a pawimawh ber zawk chu kan chak loh dan a ni. Chelsea lakah kan duhdan takin kan khel a, pass pawh kan ngah hle. Mahse counter-attack atang leh ser-piece atangin goal an khung. Kan tumpuite an khelh that chuan inkhel zawhah zahna kan lantir mai tur a ni a,” a ti.

Copyright © inkhel.com 2024. All rights reserved.