Rawlthar za zek zawk chu England hmachhawn turin bench atangin a lut, Wembley Stadium-a rei a inkhelh hmain goal a khung.

Vinicius Jr.-a shot chu Pickford chuan a lo dang a, hemi per hi Endrick chuan awlsam takin a chhuih goal. Friendly match-ah Brazil chuan si khat faiin England an hneh.

Inkhelh zawha hming langsar ber chu Endrick a ni a, Pele zawhah Ronaldo a rawn chhuak a, Neymar-a zawhah Vinicius Jr. a rawn chhuak a, tunah chuan Brazil chuan player naupang kum 17 mi lek star thar an nei leh ta.

Kum 1994 khan Ronaldo chuan Brazil tan goal a khung a, Pele-a hnua goal khung thei naupang an neih leh hmasak ber niin. Ronaldo zawhah Endrick chuan kum 17 leh ni 246 mi niin Brazil tan goal a rawn khung leh.

Endrick hi Wembley Stadium-a club leh ram tana goal khung thei naupang ber a ni bawk a, England nena friendly match an khelh zawh khan ani hming hi titi langsar ber a ni chhunzawm bawk.

"Romario nen an khelh dan a inang khawp mai, a pian hmang te, ball a khawih dan vel teah khan Romario nen inanna lai an nei.

"A hmelah khan a hlim tih a lang chiang a, Wembley stadium-a club leh ram tana goal khung thei naupang ber a ni, a chhuanawm khawp mai," tiin England midfielder hlui Joe Cole chuan a sawi.

"Bul tan tha tak a ni chiang e, kha aia tha kha ani pawhin a beisei bik lo ang. A rawn luh khan goal a khung kan ring a, a khung ta reng bawk a.

"Hetiang ang game lian hi Brazil player te tan pawh a tha a, player leh manager te tan match pawimawh tak a ni," tiin Arsenal midfielder hlui Gilberto Silva chuan a sawi ve bawk.

Endrick hi a hming pum chu Endrick Felipe Moreira de Sousa a ni a, kum 11 mi a nih laiin Palmeiras youth team a zawm.

Mi ten an ngaihven tanna chu kum 2022 Under 16 tournament kha niin, France-ah khan Brazil chu a champion pui a, he tournament-ah hian goal 5 khungin, top scorer a ni.

Khami kum October thla khan Palmeiras tan a debut game a khel. A nu leh pa te chuan Chelsea training ground an tlawh a, mahse Premier League club Chelsea khan an lo bengkhawn tehchiam lo.

Real Madrid an rawn lang ta a, Los Blancos nen contract ziakin, kum 18 a tlin hunah Santiago Bernabeu a pan dawn. Kumin July thla hian kum 18 a tling dawn.

Brazil-a a khelhpui Vinicius Jr leh Rodrygo te bakah, England midfielder Jude Bellingham leh France forward Kylian Mbappe te nen an khel ho thei dawn a ni.

Endrick hian Brazil tan game thum a khel tawh a, World Cup qualifier match-ah November thla khan Colombia leh Argentina a lo hmachhawn tawh.

Sawmna : Website advertisement hi min click sak ve thin turin kan sawm a che u.

Wembley Stadium-ah a vawi thum nan Brazil tan a inlan a, Brazil senior team tana a goal hmasa ber a khung ta a ni.