Arsenal chuan kar hmasa mai khan an manager Unai Emery an bana, tunah hian manager nghet nei lovin an assistant manager Freddie Ljungberg chuan a enkawl lailawk rih mek.

Arsenal hian manager thar an neih har a rinawm lova mahse tu nge an lak dawn tih rinthiam a harin, English chanchibu mite pawhin Gunners manager thar tur hi an inrinsiak nasa hle.

Tun lai hian manager hrawl tak tak hna nei lo an awma , an zinga langsar ber chu Juventus manager hlui Massimiliano Allegri leh Tottenham manager hlui Mauricio Pochettino-te an ni a tih theih awm e.

Arsenal hi Allegri nen sawizawm ni thin mahse Allegri hian Arsenal enkawl a tum vak lo nia sawi a awm baka, Pochettino nen Gunners hi sawizawm ni viau bawk mahse Pochettino hian tunah mai chuan North London club bawk a enkawl leh nghal a rinawm loh viau na in football-ah erawh thil thleng thei lo a awm lo tih kan hriat reng a tul.

Arsenal hian tuna Wolves manager Nuno Espirito Santo nen pawh sawizawm an ni nasa viaua , ani bakah hian Leicester City manager Brendan Rodgers nen pawh Arsenal hi sawizawm ni mahse anni pahnih hi club enkawl lai nei an ni a, an club enkawl laite an chet thatpui ve ve bawk nen Arsenal tan anni pahnih khul chhuah hi a awlsam dawn hauh lo.

Arsenal hian an interim-manager Ljungberg-a hnuaiah game khat an khel tawha, hnehna chang zo lo mahse point khat an hlawhchhuaka, Ljungberg hian Arsenal hi a enkawl zela riha beisei aia a che tha chho ta thut a nih chuan Ljungberg hi Arsenal chuan a nghetin an la chhunzawm mai lovang tih a sawi theih loh a ni.