Alisson chuan tun season chhungin Liverpool chuan theihtawp an chhuah zel dawn tih sawiin, trophy lak theih apiang chu lak vek an tum thu a sawi.

Liverpool chu tun hnaiah an che tha hle a, UEFA Champions League title an lak bakah UEFA Super Cup leh Club World Cup title te an la zui leh bawk a. Tun season chhungin Premier League lamah pawh an che tha hle a, kum 30 an lo nghahfak tawh league title chu an lak ngei a rinawm tawh hle.

Season kal mekah Liverpool chuan Premier League lamah point 22 zetin hma an hruai tawh a, an tan chuan champion loh theih a ni lo a tih hial theih a. Hetiang taka an kal tluan lai hian Alisson chuan title lak theih apiang chu lak vek an tum thu hi a sawi a ni.

Brazilian goalkeeper Alisson chuan, “Premier League title lak hi kan duh hle a, chu chauh chu kan duhtawk lo a, a dang pawh title lak theih apiang chu lak zel kan duh a, chutianga tih theih ngei chu kan tum,” a ti.

“Hun kal tawh chu hun kal tawh a ni a, kan hma lam chauh kan thlir a. Kan hmabak hi tha taka hlen chhuah kan duh a, chutiangah chuan kan rilru pawh kan sawi bing hle a. Kan thil tum berah hian kan chiang hle a, tihhlawhtlin ngei pawh kan tum,” a ti bawk.

A sawi zelnaah, “Player kan nei tha hle a, pakhatin a khelh theih loh pawhin a aiawh thei tur tha tak mai an lo awm ve leh zel a. Kei pawh ka inhliam lai khan Adrian chu a pen chhuak a, a che tha thei em em mai a. Chutiang zelin mi dangah pawh a ni chho thei zel mai a ni,” a ti.

“Tuna kan hun hman dan hi nuam kan ti a, a chungnung bera awm theih hi chu a nuam em em a. Kan khelh danah kan lung a awi a, khelmual chhungah leh pawnah pawh kan inlungrual em em a, theihtawp kan chhuah tlang zel a ni,” a ti.