Alisson Becker chuan season tan leh hunah trophy dang lak belh ngei a tum thu a sawi chhuak.

Liverpool goalkeeper Alisson Becker chuan 2018-19 season chhungin UEFA Champions League title a lak bakah Copa America title a la zui leh bawk a. Trophy hi a dang pawh tam tak lak belh theih ngei a duh thu a sawi.

Roma goalkeeper hlui Alisson hian July 2018 ah khan Reds chu £67 million (€75 million) in a zawm a. Season chawlh an hmang zo a, tunah chuan season thar atan an inpuahchah leh tan tawh a, Thawhlehni khan Liverpool training a zawm ve leh tawh a ni.

“Season liam taah title lian tham tak mai ka la thei a, a ropui ka ti hle a. UEFA Champions League title ka lak bakah Copa America title ka la zui leh bawk a, a lawmawm duh hle a. Tun season lo awm turah pawh hian beiseina ka nei sang hle a, thahnemngai takin ka ti chho tang tang ang a, title dang ka lak belh ngei ka beisei,” tiin Alisson chuan a sawi a ni.

“Club training zawm tura ka let leh ta hi nuam ka tiin lawmawm ka ti a. Chawlh lai khan chhungkuain hun nuam tak mai ka hmang a, thiante bulah pawh ka awm nasa a. Hetih rual hian khelmuala awm leh vat vat ka chak a, club chhunga thawktu hrang hrangte kha ka ngai hman viau a ni,” a ti bawk.

A sawi zelnaah, “Tunah chuan theihtawp chhuah a inpuahchah ka duh ber a, tha taka khelmuala che thei tura inbuatsaih hi ka vei ber a ni tawh a. Kan team pawh kan phur tlang hlawm hle a, season hmasa anga chet fuh ngei kan tum hlawm a. Tun season-ah chuan title awm thei zawng zawng chu lak theih vek kan tum dawn a, chutiang tipuitling thei tur chuan kan thawhrim viau erawh a ngai dawn a ni,” a ti.

Kum 26-a upa Alisson hian Brazil chu kum 12 chhunga a vawi khatna atan trophy a lakpui a, Copa America-ah khan game 6 khelin goal 1 chiah a chhuah a ni.