13 Jun 2019 12:21

bakteaJr.

Mizo tlangval

Trophy la tur chuan a tir atangin kan inpeih a ngai – Matic

Manchester United midfielder Nemanja Matic chuan season tharah trophy an la duh a nih chuan a tir atangin rilru leh taksa lama an inpeih nghal a ngaih thu a sawi.

United hi season hman zawh takah khan an che tha lo hle a, Premier League-ah pawh paruknaah awmin season tharah Champions League an khel dawn lo.

Season laklawhah an manager Jose Mourinho an ban a, Mourinho hnuaiah hian kum 28 chhunga season bul an tan chhiat leh ber tum an tawng.

Mourinho thlak tur hian United hian an striker hlui Ole Gunnar Solskjaer laluta, a tirah che tha chho viau mahse thla hnih vel bak an daih lo.

Matic chuan, “A ni hmasa ber atangin rilru leh tihtakzeta kan beih a ngai dawn a, kan taksa leh kan rilru lam hi season thar atan a tir atangin a inpeih a ngai. A eng lam zawngin thil kan thlir a tul a, trophy lak ngei kan duh a, chumi tur chuan kan vaiin kan inpeih takzet a ngai,” tiin club website a hrilh.

United hian tun season mai pawh ni lovin, Sir Alex Ferguson-a awmloh hnuah tun hma an phak tawh loh zia chu sawi tam ngai a ni hauh lo. Insiamthat tumin sum tam tak an seng tawh a, eng an ang hleithei lo. Season thar a tan pawh inbuatsaih mek zelin Swansea atangin Welsh midfielder Daniel James an lalut tawha, James hi tun bazar hun chhunga an player lakluh hmasak ber a ni.