Tun season Premier League-a an tum ber ti hlawhtling turin Manchester United chuan point khat chiah an mamawh tawh, ningani zan zanlai hian Chelsea an hmachhawn dawn a, heta hnehna an chang a nih chuan season tharah United hian Champions League an khel ang.
Tun kar chhung hian Manchester United hian match hnih khelh hmabak an nei. Liverpool-in an game hnuhnung berah hnehna chang mah se, United hian Chelsea emaw Fulham emaw laka point khat tal an hlawhchhuak a nih chuan, season tharah Champions league an khel dawn chiang.
United boss Erik ten Hag chuan hma an sawn nasat thu a sawi rualin, hei aia nasa zawka hmasawn thei an nih thu a sawi a. Tun season chhungin Carabao Cup no mawi an chawi tawh a, June ni 3 hian FA Cup final an khel dawn a, Manchester Derby kan hmu dawn a ni.
"Tuna kan rilrua awm hmasa ber chu Chelsea hneh a ni, hnehna kan chang a nih chuan tun season league lama kan tum ber chu kan ti hlawhtling phawt dawn tihna a nih chu.
"Chumi zawhah chuan tun season chhunga kan chet that leh that loh chu min teh thei ang, a tehtua zir te pawh a ni bawk ang a. Hmachhawp kan nei a, trophy chawi chhoh leh hi kan tum ber a ni.
"Trophy pakhat chu ka hoin kan chawi tawh, hei aia tam chawi hi kan duh. Team tha te khing phaka awm hi kan duh a, bul kan tan chho leh mek a, kawng dik kan zawh chho mek a ni.
"Kan che tha thawkhat viau alawm, chutih laiin chetha thawkhat nih hi a tawk lo. Champion theihnaah chuan champion vek kan duh dawn, chu chu kan tum ber a ni reng dawn a ni. Chelsea kan hmachhawn hunah pawh hian hnehna chan mai a tawk dawn lo, game thununtu nih kan tum dawn a ni," tiin Erik ten Hag chuan a sawi.
Inhliam avanga Wolves leh Bournemouth hmachhawn thei lo Marcus Rashford pawhin training a zawm leh tawh a, Ten Hag chuan, "Chelsea kan hmachhawn hunah a khelh theih ka beisei.
"Training a rawn zawm ve tawh a, a dinhmun kan en fiah ang a, chutah chuan Chelsea hmachhawn turin thlan chi a ni dawn em tih kan en ang," tiin Rashford-a chungchang a sawi.
PSG chuan Manchester United hnenah Neymar an zawrh tih thuthang awm chungchang chu Ten Hag zawh a ni a, United boss chuan, "Chanchinthar kan neih chuan ka hrilh zel ang che u," tiin reporter-te a chhang.
Ningani zan hian Manchester United chuan Chelsea an mikhual ang a, May ni 28-ah Fulham an mikhual leh ang a, Premier League season an khar ang. June ni 3-ah FA Cup final khelh hmabak an la nei bawk a, Manchester City nen final hi an khel dawn a ni.