WWE legend Triple H chu vawiin (July 27) hian kum 50 a ni ve ta a, a piancham pual hian a chanchin thenkhat lawr khawm nual teh ang.
Triple H tia khawvelin a hriat lar em em, Paul Michael Levesque hian 1995 kumah khan WWF huang a dai ve tan a. Kum 24 chhung vel zet chu World Wrestling Entertainment nen an inzawm chho tawh a, tunah phei chuan an puipa berte zinga mi a ni.
Entertainment wrestling a luhchilh hnuah hian hming lem an phuahsak hman nual a, Triple H tih bakah hian The Cerebral Assassin, The Game leh The King of Kings tih te chu a lar zual deuhte an ni a. 2013 atang khan Triple H hi WWE ah hian Executive Vice President of Talent, Live Events and Creative a ni chho tawh a, NXT founder leh senior producer a ni tel bawk a ni.
Paul Michael Levesque hi New England atanga chawr chhuak niin, helai hmun atanga khawvel hriata lar chhuak hi a dang pawh an awm nual a. John Cena chu West Newbury, Massachusetts atanga chhuak niin, Spike Dudley chu Rhode Island lam chhuak a ni bawk a. Triple H hi Nashua, New Hampshire a piang a ni.
Rei vak lo chu Triple H hi hmeichhe wrestler Chyna nen an inkawp ve hman a, 2000 kumah khan an inthen leh a. Chyna pawh hi Triple H ang bawkin New Hampshire lam chhuak tho a ni.
Wrestler palian ve thawkhat tak Triple H hi a inhliam avangin a chawl zeuh zeuh fo a, heti chung hian a chawl hlen duh bik lo a, wrestling khawvelah chuan a kir leh zel a ni.
May 21, 2001 ah khan Raw ah Triple H hi a che fuh lo a, a vanglai hun a tawp teuh hle a. Stone Cold nen an tang dun a, Chris Jericho leh Chris Benoit te inkawp nen an inhmachhawn a. Triple H hian Chris Jericho ‘Walls-of-Jericho’ chu tawn chhiat a tum a, hetia a chetnaah hian a malpui veiam tihrawl chu a tikhawlo palh a, a tihrawl hi a ruh atangin a thlawn hlawk a. Vanneihthlak takin a hliam hi a hnuah a dam leh a, wrestling chu a tih chhunzawm leh thei ta zel a ni.
2002 kumah pawh khan Survivor Series match-ah Triple H hian a hrawk chu a tina viau bawk a. Rob Van Dam chuan a hrawk hi a delh na hle a, hemi tumah pawh hian a vannei leh hlauh a, pawi thui tak a thleng ta lo.
2007 kumah Triple H hian Randy Orton lakah New Year Revolution Pay Per View event-ah spine buster tih a tum a, hetah hian 2001 kum ang deuhin a malpui dinglam tihrawl chu a tikhawlo ve leh a, hemi tumah pawh hian a hliam a enkawl dam a, wrestling ring chhungah a lut leh tho a ni.
Triple H hi vawi 8 ngawt chu WWE champion a ni thei a, World Heavyweight Champion title pawh vawi 5 chu a la tawh bawk a. 1995 atanga entertainment wrestling ti tan ni mahse August 23, 1999 khan WWE championship title chu a la ve chiah a ni.
WWE championship title hi Raw-ah a la a, Shane McMahon chu guest referee atan a inruat a, Triple H nena inhmachhawn Mankind chu Shane hian steel chair-in a vua a, hemi zarah hian Triple H chuan title hi a la thei chauh a ni.
Wrestling huang chhung leh pawn lamah pawh Triple H leh The Rock te chu an inmil vak lo hle a, pawn lamah pawh tawngkain an inbei zeuh zeuh thin a. Ama chanchin a ziahnaah te leh wrestler dangte tawngka atangin Paul Michael Levesque hian zu a in ngai miah lo a, hei hi Shawn Michaels leh Kevin Nash te pawh khan an sawi chhuak a ni.