27 Aug 2015 06:40

Inkhel

Mizo Sports Website hmasa ber

​Transfer hun ral hmain Chelsea-in £70m laiin Pogba lak an tum

September ni 1, 2015 hian kumin nipui transfer bazar England-ah chuan khar a ni dawn, hemi hma ngei hian Chelsea chuan Juventus midfielder Paul Pogba lak ngei an tum niin Mirror chuan a tarlang.

Chelsea hian £70m lai Pogba manah hian an thehchhuak nia tarlan a ni a, karleh mai hian transfer hun a tawp tawh dawn, hemi hma ngei hian Chelsea chuan kum 22 mi French midfielder hi lak an tum dawn.

Chelsea hian season bul an tan chhe hle, match thum atangin goal 7 lai an chhuah, hei vang hian defence lam thawm that nan Everton atangin John Stones lak an tum, Chelsea hian vawi thum lai Stones hi an lo dawr tawh a, a vawi khat nan £20m, a vawi hnih nan £26m, a vawi thum nan £30m. Mahse Everton chuan heng zawng zawng hi an hnawl vek, Stones chhuah an phal loh thuin an chhang.

Hetih lai hian Stones chuan thawhlehni khan chhuah a dil niin media te chuan an tarlang a, Chelsea chuan Stones lak ngei an tum ruh hle. Tin, Barcelona atangin Pedro an lei tawh bawk a, a debut match-ah goal a khung nghe nghe. Chelsea hian an duhthusam player te lak kim hman an tum ruh hle a ni.

Manchester City chuan £49million in Raheem Sterling an lei tawh a, £32million -in defender Otamendi, £8million -in midfielder Deph an lei bawk. £57million laiin Kevin De Bruyne an rim mek bawk. Hetiang khawp hian an che na, Jose Mourinho chuan player thar an lak loh chuan title humhim a harsat tur thu a sawi a nih kha.

Jose chuan Pogba tha a tih thu sawiin,"Pogba hi khawvela player tha ber pawl a ni. A team khelhna chuan an thatpui ziah, Juventus a chhuahsan a nih chuan a luhna club chu an tha khawp ang, tin a cham a nih pawhin Juventus-in an thatpui leh zual bawk ang," tiin.

Juventus chuan Chelsea atangin Juan Cuadrado loan-in an hawh a, Juve hian Chelsea player dang duh an neih thu an sawi bawk, hengte a nih avang hian Juventus leh Chelsea te hi Pogba chungchangah entin tin emaw an inrem thut a rinawm tlat niin a lang.