​Transfer deadline day-a player chesawn tura rinte

31st August 2016, 07:08PM

2015 transfer window-ah khan Premier League club-te chuan £859m vel player lei nan an hmang a. Kuminah erawh broadcasting deal thar sum tam tak club ten an dawn dawn avangin English Premier League an che na salh salh hle mai.

English Top Flight club-te chuan player thar lei nan £800million chuang an seng tawh a, £1billion an hawlh kai rawk dawn chiang niin a lang. Tun nipui bazar chu Manchester United an tal na hle a, World Class player pahnih Zlatan Ibrahimovic leh Paul Pogba te an lalut a, Pogba phei chu khawvela footballer man to ber a ni nghe nghe.

Manchester City pawhin English defender John Stones chu £47.5million laiin Everton atangin an lei bawk a. League dangah pawh transfer lian tham a thleng nual, Juventus chuan Napoli atangin £75million in Gonzalo Higuain an la lut a, Real Madrid pawhin an striker Alvaro Morata an la kir leh tawh bawk.

Tun nipui bazar deadline day-a English Premier League-a player che sawn tura rinte chu hetiang hian :

1. Jack Wilshere (Arsenal)

England team-ah hmun a chang tawh lo, tun season Premier League-ah pawh Arsene Wenger chuan a chhawr tam lo hle, kum 24 English midfielder hi talent nei tha tak a nih laiin inhliam avangin rei tak tak a chawlh bakah amah a invawng lo thin a. Europe-a club heng Valencia, Roma, Juventus, West Ham United, Crystal Palace, Southampton leh Middlesbrough te zingah hian a khawiah emaw bera a kal a rinawm a ni.

2. Moussa Sissoko (Newcastle United)

Kum 27 mi French footballer hi Euro 2016-ah ram tan a khel tha hle. Hetih lai hian Newcastle United chu Championship lamah an khel tawh si a, he box-to-box midfielder hi Newcastle United chuan £35m an chhiar mek, a chhuak ngei dawn niin a lang. Heng Europe club Juventus, Inter Milan, Everton, Spurs, Crystal Palace leh West Bromwich Albion-te zingah hian a khawi emaw ber a pan rin a ni.

3. Saido Berahino (West Bromwich Albion)

Nikum nipui bazarah khan a chhuak mai tawh dawn nia a lan laiin a club an chhuah phal lo. Kum 23 mi England striker Berahino hi Baggies tan khelh a tum tawh loh thu a sawi hnuah thla 12 lai a liam leh tawh a, tun nipui bazarah hi chuan Stoke City emaw Crystal Palace emaw a zawm ngei dawn nia rin a ni.

4. Lamine Kone (Sunderland)

Sunderland defender Kone hi Everton lam chuan lei tumin an dawr mek a, bbc in a tarlan dan chuan Everton chuan Kone manah £18m lai an thehchhuak phal a. John Stones an hralh hnuah Everton chuan Stones thlakna tur an melh chhunzawm nghal char char a ni. Tin, Everton mai a ni lo, Conte pawhin Stamford Bridge-ah Kone hi lak luh a tum dawn nia report a ni mek bawk.

5. James McCarthy (Everton)

Everton manager Ronald Koeman chuan kum 25 mi Republic of Ireland midfielder hi zawrh lai a nih loh thu sawi sawi mahse Toffees chuan Moussa Sissoko leh Kone an ngaihven ve reng avangin £20m vela club dang dilna hi an hnar phal a rinawm loh. James McCarthy hi Crystal Palace, Sunderland, Newcastle United leh Leicester City-ten an ngaihven mek a ni.

6. Wilfried Bony (Manchester City)

Pep Guardiola-a hnuaiah hmun a chang lo, nikum January thla khan Man City chuan Swansea atangin Bony hi £28m laiin an lei a nih kha. Kum 27 mi Ivory Coast striker hi Guardiola-a plan-ah a tel ve tawh lo, amah ngaihventu Stoke City, West Ham United leh Everton-te zinga a khawi emaw ber hi a zawm ngei rin a ni.

7. Mario Balotelli (Liverpool)

Manchester City atanga pet chhuah a nih hnu khan Balotelli hian hniam lam a pan mek zel a, AC Milan tan loan-in khel mahse loan hun a zawh hnuah Liverpool-ah a kir leh. Liverpool manager Klopp chuan fit taka a awm hnuah Liverpool chhuahsan mai turin a ti. A hlawh a tam si a, chuvang chuan amah awt tak tak pawhin an la ngam lo. Italy club lamah a kal leh mai dawn nia sawi a ni. Palermo supporter-te chuan Balotelli hi an duh thu an sawi a, Nice lam pawh a pan thut thei reng bawk a ni.

8. Samir Nasri (Manchester City)

West Ham an hneh tumin tha takin khel mahse season tharah hian Pep Guardiola-a hnuaiah hmun a chang dawn lo tih a chiang tawh. Kum 29 mi Nasri chuan amah ngaihventu Sevilla emaw Besiktas emaw a pan mai a ngai dawn ta niin a lang.

9. Islam Slimani (Sporting Lisbon)

Kum 28 mi Algeria forward Islam Slimani hian a khelhna Lisbon chhuahsan tur angin a khawsa mek nia report a ni. English Champions Leicester City chuan Vardy thlawp turin an duh a. Tin, ram tana a khelhpui Mahrez a awm bawk nen, £35m lai chhiar mahse Leicester City chuan an lei mai dawn nia sawi a ni.

10. Mamadou Sakho (Liverpool)

Jurgen Klopp chuan US-a tour an neih tumin a thawn haw a nih kha. Liverpool chuan loan-in an chhuah tir mai dawn niin thu a thang mek. Kum 26 mi he defender hian West Brom emaw Stoke City emaw a pan ngei dawn niin a lang.

Source : bbc

2016 European Football Transfer Deadline Day Latest News
Copyright © inkhel.com 2024. All rights reserved.