Chelsea midfielder hlui Jon Obi Mikel chuan Chelsea player hlui Eden Hazard chu training-naah an thatchhe viau thin niin a sawi.
Mikel leh Hazard-te hi kum eng emaw zah chhung chu West London club Chelsea-ah an khel duna, an inhriatchian viau pawh a rinawma, Mikel hian training-naah Belgium captain hi a taihmak loh thin thu sawi mahse khelmual chhunga a that zia erawh a hmuh hmaih sak hauh lo.
Mikel hian season 11 chhung zet Stamford Bridge-ah hun a hmanga, Hazard nen hian season nga khel dunin, Hazard aia tha player a la khelhpui ngai loh thu leh Frank Lampard chu a khelhpui tawha player taima ber a nih thu a sawi tel.
Mikel chuan, “Hazard kha player tha em em mai a ni a, Lionel Messi ang em chu a nilo pawh a ni maithei mahse a keah ball a awm chuan a duh duh a ti thei a ni ber. Training a bei ngawrh ngai lem lova, kan training lai te hian a lo ding anga kan zawhfel hun hi a lo nghak thina, mahse Sunday-ah game khan khelh chuan 'man of the match' a ni ziah tho va, mak tak a ni,” tiin beIN Sports a hrilh.
Mikel hi beIN Sports chuan player taima a tih ber an zawta, Mikel chuan, “Frank Lampard” tiin rang takin a chhang zui leh bawk.
Mikel hian kum 2006-ah Chelsea hi a zawma, kum 2017 thleng West London club-ah hian awmin, Hazard ve thung hian kum 2012 khan Chelsea zawmin nikum nipui khan Real Madrid a pan. Mikel hian kum tam tak chhung tuna Chelsea manager ni mek Lampard pawh hi Chelsea-ah a khelhpuia, trophy thahnem tak an chawi dun bawk a ni.