Rafael Nadal chuan Roger Federer anga tournament lian atanga inhnuhdawh a tum loh thu sawiin, a theih phawt chuan tournament lianah chuan tel zel a tum thu a sawi.
Roger Federer chuan a zawnin kum hnih chu French Open-ah tel a tum lo ta a, Nadal erawh chuan hetianga tournament liana tel loh zel chu a duh loh thu a sawi a. Tun karah Monte Carlo Masters-ah Nadal hian champion a tum hle a, chuti a nih loh chuan World No. 1 a nihna chu Federer laka hloh leh a duh lo a ni.
Kum 36-a upa Federer leh Rafael Nadal te hi tennis ranking-ah a chungnung ber pahnih an ni chho zel a, heng avang te pawh hian Nadal chuan a theih anga tam inkhelh a duh a, World No. 1 nih theih zel a duh a ni.
Federer hi French Open-ah hian nikumah pawh a lo tel tawh lo a, clay court-a inkhelh aiin grass court lampang a thlang zawk a. Nikum khan a inhliam dam hnuah Australian Open champion a rawn ni leh a, hemi hnu hian French Open atangin a inhnukdawk a, chumi hnuah Wimbledon champion a nih leh bakah Melbourne lallukhum pawh a vawng him zel a, major title 20 a la tling ta hial a ni.
Swiss pachal hian a taksa upa ve tan tawh chu tlema chawlhtir tam deuh a duh a, kum 31-a upa Nadal erawh chuan a theih anga tam la khelh hi a la tlin a ring thung a. Federer chuan a theih hram chuan Roland Garros velah Nadal hmachhawn loh a duh a, chu chu a tipuitling dawn chiang hle.
Nadal chuan, “Tournament thenkhat hi chu tel lohna atan chuan ka ui a, tournament khelh nuam tih deuh deuh lah ka nei hlawm bawk a. Duh reng vanga Monte Carlo vela khelh loh chu ka duh miah lo a, chutiang bawkin Wimbledon te, U.S. Open, Australian Open leh Rome-ah te pawh tel ngei ngei ka duh hlawm a ni,” a ti.
Spaniard pachal hi a khel hliam vangin a chawlh deuh phah a, Australian Open quarter final-ah Marin Cilic nen an inkhelh laiin a khel hi a na a, set 5-naah Nadal hi a chawlh phah a ni.
June 3 khian French Open khelh laiin Nadal hian kum 32 a tling dawn a, vawi 16 zet Grand Slam champion lo ni tawh hian Federer te kum ang a nih chhoh ve hunah chuan a ngaihtuahna pawh a danglam tawha a rin thu a sawi.
“Kum a upat chhoh chuan tlem tlema insiamrem a ngai tawh thin a, a hma ang ngawt kha chu a ni thei tawh dawn lo a. Amaherawhchu, ka tan chuan grass-ah emaw, clay-ah emaw ka khel duh lo tih ngawt hi harsa ka tih zawng tak tur a ni a. Hetiang hi ka remruatnaah a tel ngai lo a, nakinah chuan ka la ti ve pawh a ni maithei a, engmah sawi lawk theih chu a ni lo e,” tiin Nadal chuan a sawi.
Rafael Nadal hian Monte Carlo leh Roland Garros ah te a title 11-na a beisei ve ve mek a, May 27 atangin tournament hi a intan ang.