Novak Djokovic chuan Tokyo Olympics chu tournament lian dang ang bawkin a hmachhawn dawn tih a sawi.

World No. 1 Novak Djokovic hian tun season chu tha taka hman a tum thu sawiin, a elpui dang pahnih, tennis player ropui Roger Federer leh Rafael Nadal te chu theihtawp chhuaha um zel a tum thu a sawi chhuak.

Kum 32-a upa Djokovic chuan Belgrade khawpuiah chanchinthar lakhawmtute a kawm a, hetah hian thla hmasaa Serbian national team te’n ATP Cup title an lak zarah khan kumin Australian Open title pawh a lak theih phah niin a sawi a. Aussie Open title hi vawi 8 a lakna niin, ATP ranking-ah pawh Rafael Nadal chungah a awm theih phah a ni.

Djokovic chuan, “Ka beisei aia thain season bul ka tan a, hei vang hian ka phur lehzual a. Tun season chu a tha thei ang bera hman chhunzawm zel ka duh a, chutiang tur chuan ka rilru pawh ka siam nghal a ni,” a ti.

“Bul ka tan thatna hian min tiphur em em a, fuihtu tha tak mai a ni ber a, ka tana season awm tawh zawng zawnga tha ber ni thei ngei turin tan ka la dawn a. Olympic season a ni tih ka hria a, hei vang hian inkhelh hnem pawh a ngai dawn tih a chiang hle a. Wimbledon zawhah chawlh hahdamna hun pawh a tlem viau dawn a ni,” a ti bawk.

A sawi zelnaah, “Ka tum ber chu Grand Slam atana tha taka inbuatsaih a ni leh dawn a, chutih rual chuan Olympic Games atan pawh tha takin ka inpuahchah dawn a, tournament lian dang ang bawkin ka khel ang a. Beijing Olympic 2008 ah khan Serbia tan bronze medal ka la thei a, a hlu ka ti hle a, a dang pawh lak belh theih ngei ka tum a ni,” a ti.

Tokyo 2020 Olympic Games-ah Serbia aiawha a tel thei tur chu Djokovic chuan lawmawm a tih thu sawiin, a ngaihlu hle tih a sawi chhuak a ni.