26 May 2015 08:06

Asanga Tlau

Toure a'n Man City chhuahsan dawn lo?

Manchester City midfielder Yaya Toure chu a club thuneitu ten club tana a pawimawh em avangin chhuak lo turin an duh tiin a agent chuan a sawi.

Toure-a agent Dimitri Seluk hian kum 32 a upa Toure a'n club chhuahsan a hnaih tawh hle a, 100 a 90 in ka chiang tiin a lo sawi tawh a nih kha. Amaherawhchu Sky Sports News ah Seluk chuan Inter Milan nena sawi zawm ni mek Toure chuan City a chhuahsan dawn lo tiin a sawi ve leh thung.

Tun season Premier League ah Toure hian game 29 a khela, goal 10 khungin City chu 2-na a nihpui a ni. 2010 khan Barca atangin Toure hian City a zawma, 2012 leh 2014 ah te Premier League nomawi a chawipui ringawt nilovin an chawi theihna kawnga an player pawimawh ber pawl tia sawi theih a ni. 2011 ah FA Cup a lo chawipui tawh bawka, 2014 khan League Cup a chawipui bawk.

Toure hian kum hnih a contract kal lai ah hian a la neia, North America a post season tour an neih turah pawh squad ah telh chhunzawm a la ni hrih a ni. He tour hi May ni 27 hian an tan anga, ni 27 ah hian Toronto FC an hmachhawn ang. A tukah Houston Dynamo hmachhawn leh turin Toronto an chhuahsan lehnghal dawn a ni.

May ni 30 ah an tour an khar anga, chumi hunah chuan an club peng pakhat New York City FC in MLS a Houston Dynamo an hmachhawnna an chhim dawn a ni.