Tottenham winger Lucas Moura chuan Tottenham tan hun thar a inhawn mek thu leh an tan trophy lak a hun ve tawh thu a sawi.

Tottenham hian kum 2008-a League Cup an chawi bak trophy an la chawi leh lova, season liamta khan trophy chawina hun tha tak nei mahse Champions League final-ah Liverpool an hneh lo.

Tottenham hian an manager Mauricio Pochettino hnuaiah semi-final vawi nga an lut tawh a, Premier League-ah a sang pali zingah an tel deuh ziah bawk.

Brazilian winger Lucas chuan, “Kan tan hun thar a inher chhuak mekin ka hria a, inrintawkna pawh kan nei nasa lehzual hle. Champions League final-te kan luta, stadium thar te kan nei ta bawka, level tharah kan kai niin ka hria.

“Mipui pawh hian a hma aiin min ring tawh zawka, chu chu nemngheh sak an ngai. Team lian kan ni tih hi kan lantir a, club lian tak leh squad tha tak kan nei tih hi kan lan chhuah tir a ngai a ni. Trophy lak lampang hi beisei a hun tawh hle a, chu chu kan hmachhawp tharlam pawh a ni a, kan theihtawp kan chhuah dawn a ni,” a ti.