16 Sep 2020 09:57

bakteaJr.

Mizo tlangval

Tottenham squad-ah Alli a awm lo

Tottenham chuan an midfielder Dele Alli chu an chhuah tir dawn anga sawi a tam hle a, chanchin titam zual turin, Alli hi squad atanga thlauhthlak a ni leh bawk.

Tottenham hian naktuk Ningani zan hian Europa League second qualifying round-ah Lokomotiv Plovdiv an hmachhawn dawna, he inkhel atana squad puanah Alli-a hming hmuh tur a awm ve lo.

Tottenham hian an player hlui Gareth Bale chu Real Madrid atanga lak luh an tum meka, Bale an lak luh theih nan hian Alli hi Santiago Bernabeu-a kal tir an tum nia sawi a awm mek.

Tottenham manager Jose Mourinho leh kum 24 mi Alli-te inkar hi a tha lutuk lo nia sawi a awm bawka, Alli hi Mourinho chuan chhawr tam a tum lem lo niin a lang bawk.

Chanchin an neih sa tawh laiin, Plovdiv hmachhawn tura Bulgaria-a Alli a zin ve loh avangin English media te an phusa hle a, loan emaw talin Tottenham hian English midfielder hi chhuah tir dan an ngaihtuah niin sawi a ni.

Tottenham leh Real te hi Sergio Reguilon chungchangah an indawr meka, hemi pah hian Spurs hian Bale pawh an ngaihven nghal niin a langa, Real hian Bale hi chhuah tir an duha, Bale hian Real chhuahsan hi a duh ve bawk a, an indawrna karah hian Alli a tlazep ve mek niin a lang a ni.