10 Jan 2019 01:20

inkhel

​Tottenham-in Wembley an la hmang rih dawn

Tottenham chuan an stadium thar sak mek chu an la peih fel hleithei lova, thuchhuah thar siamin February thla laihawl thleng chu Wembley Stadium an la hman tur thu an sawi.

February thla laihawl thleng Wembley an hman tur thu an sawi rual hian, an stadium thar an hman theih hun tur an la sawi thei lo fova, eng chen nge Wembley an hman dawn hi a sawi chian theih rih loh.

Tottenham hian stadium thar mi 62,000 lenna an sa mek a, peih fel thawkhat tawhin enchhinnate pawh nei zeuh zeuh mahse a la hman tak tak theih lova, February ni 13 chho vel thleng chu Wembley an la hman ngei ngei a ngai dawna, hemi hnu pawh hian an pawhsei leh tho a rinawm.

Tottenham hian February ni 10-a Premier League inkhela Leicester City an hmachhawn tur chu Wembley-ah a la nih tur thu an sawi a, hemi hma hian Wembley-ah Watford leh Newcastle-te an hmachhawn bawk dawn. Wembley-ah hian mi 90,000 lai leng mahse heng Premier League inkhelah-te hian Tottenham inkhel hi a tam berah mi 51,000 bakin en phal a ni dawn lo.

Spurs hian FA Cup fourth round-ah Crystal Palace an hneh chuan fifth round pawh Wembley-a khelh a la ni dawn a, Champions League-a Borussia Dortmund an mikhual tur pawh Wembley-ah tho hian a la ni dawn.

Tottenham chairman Deniel Levy chuan an stadium peih fel theih loh chungchangah thupha chawiin, “Kan supporter-te chungah thupha ka chawi a, dawhthei taka min nghah avangin lawmthu ka sawi bawk. Stadium hmelhriat tirna programme kan siam a lo tel zawng zawng-ten stadium thar in hmuh dan chungchang in sawi te kha hriat a nuam em em a, tu tan pawh a nuam thei ang bera siam kan tum zel. Kan la enchhin chho zel dawn a, tun atanga kar hnih emaw kar thum hnu velah thuthar kan neih leh ngei a rinawm,” a ti.