Tottenham chuan AC Milan atangin striker Krzysztof Piatek chu loan-a lakluh tumin an dawr mek niin tarlan a ni a, AC Milan hian Spurs dawrna hi an lo hnar tawh niin tarlan a ni bawk.

Chanchinbu thenkhat chuan inbiak chu kalpui tan tawh a nih thu leh indawrna mumal tak tak a la awm lo tih an tarlang ve mek bawka, mahse Tottenham hian tun thla chhung ngeiin Piatek hi hawh an duh niin a lang.

Tottenham goal thun khawl ber Harry Kane chu a inhliam a, a inhliam nat angreng avangin zai a ni a, April thlaah bak a lo kir theih dawn loh avangin Spurs hian striker an melh chawp deuh chuk chuk a, Piatek-a lam hi an hawi.

Tottenham hian Polish striker hi loan-in lakluh an tum anga tarlan ni mahse, chanchinbu thenkhat chuan a ngheta lei an tum angin an sawi bawka, rin zawk tur hriat thiam har mahse loan-a lakluh an tum hi a rinawm zawk.

AC Milan hian an striker hlui Zlatan Ibrahimovic chu a thlawna an lakluh leh tak avangin Piatek hi Spurs hnenah hian loan-a kal tir mai an remtih a beiseiawm viaua, mahse an duhthusam anga inremna a awm lo a nih chuan Piatek hi an chhuah phal a rinawm loh bawk.

Piatek hian nikum January thla khan Genoa atangin AC Milan hi a pana, Milan hian kum 25 mi manah hian pound maktaduai 31 sengin kum li leh a chanve daih contract an ziahpui a ni.