Daily Mail chuan Tottenham-in United captain Harry Maguire an duh niin a report mek e. Spurs hian goal an khung ve thei hle, hetih lai hian an tlarhnung a pawp thin a, goal an chhuah hnem em em bawk. Season liamta khan Premier League game 38 atangin goal 63 lai an chhuah.

Manager atan Ange Postecoglou  an la lut fel tawh a, ani hian an tlarhnung rem phui chu a hna hmasa berah a dah dawn. Spurs chuan Maguire chu an harsatna chinfel nan an hmang thei ang em? tih chu tunah hian an thlithlai mek nia report a ni. 

Khawvela defender man to ber hi kum 2019 khan Manchester United a zawm a, kum 6 chhung atan contract a ziak a, hetah hian contract chhunzawm theihna an ziak tel bawk.

Old Trafford-ah hian kum 2 vel contract a la nei, a hlawh a tam bawk nen, man tlawm taka thehchhuah theih a ni dawn lo. Hetih lai hian United-in an thehchhuak duh hrim hrim a nih chuan, 10 million pound vel chu an sen ral a ngai dawn nia report a ni.

Ten Hag chuan an captain hi a hma lam hun tur chingfel turin a ti a, Lisandro Martinez leh Rafael Varane te chu Ten Hag-a duhthlan te an ni tih a chiang. A tu emaw zawk zawk an inhliam pawhin, Maguire chhawr loin left back Luke Shaw chu Centre Back-ah a chhawr thin bawk.

"A dinhmun angah hian mi dang pawh an hlim bik lo ang. Ani pawh a hlim bik lo. Training tha takin a nei a, a theihna zawng zawng a chhuah thin.

"A thil tawn mek hi huaisen takin a hmachhawn zel a, captain a nih bawk avangin kan tana mi tangkai tak a ni reng bawk.

"Hetih lai hian a position-ah hian competition a sang em em, Rafael Varane a che tha em em bawk si. Kan mamawh hunah theihtawp a chhuah a, a hna tha takin a hlen thin.

"Chutih laiin thutlukna siam tur erawh a nei dawn a ni," tiin Manchester United boss Ten Hag chuan Harry Maguire-a chungchang a sawi a nih kha.