11 Aug 2019 12:18

bakteaJr.

Mizo tlangval

​Tottenham-in kaithar Aston Villa an hneh

Tottenham chuan tun season-a an game hmasa berah kaithar Aston Villa an lo mikhuala, Tottenham hi 3-1 in an chak.

Villa hian goal an khung hmasa a, John McGinn chuan inkhel tan tir teah Villa hi hma a hruaipui. Tottenham tan hian kum 22 mi pound maktaduai 56 man Tanguy Ndombele chuan an si phurh a rula, a hnuah Harry Kane chuan goal hnih dang a khung belh.

Tottenham 3-1 Aston Villa

(Ndombele 73’, Kane 86’, 90’) (McGinn 9’)

Player Ratings

Tottenham Hotspur: Lloris 5, Rose 5, Alderweireld 6, Sanchez 6, Walker-Peters 6, Ndombele 7, Winks 6, Sissoko 5, Lamela 6, Lucas 6, Kane 7 Substitutes: Eriksen 6, N’Koudou n/a, Skipp n/a,

Aston Villa: Heaton 7, Taylor 6, Mings 8, Engels 7, Elmohamady 6, Hourihane 6, Grealish 6, McGinn 7, Trezeguet 7, El Ghazi 6, Wesley 6 Substitutes: Jota 5, Kodja 5, Luiz n/a

Match Report

Mual neitu lam Tottenham hian 4-3-1-2 formation an hmanga, Hugo Lloris chuan si ban nghakin, defence-ah Walker-Peters, Toby Alderweireld, Davinson Sanchez leh Danny Rose-te an intlar. Tottenham in an lei thar; an player manto ber Tanguy Ndombele chuan inkhel bul a tan a, midfield-ah Harry Winks leh Moussa Sissoko-te nen an awm ho. Tlar hmaah Harry Kane leh Lucas Moura-te inkawpin an hnung chiahah Erik Lamela dah a ni.

Aston Villa hian 4-1-4-1 formation an hmanga, Tom Heaton chuan si ban nghakin defence-ah Elmohamady, Engels, Mings leh Taylor te dah an ni. Defence hma chiahah Hourihane awmin, a hmaah Jack Grealish leh McGinn-te dah an ni a, wing-ah El Ghazi leh Trezeguet te awmin Wesley chu hmatawnga maltlat tir a ni.

Inkhel tan a ni a, Aston Villa lam hian kaithar an ni tih theihnghilhin an tlangnel hle a, minute sawm pawh tling lovah goal an khung nghala, ball kang tha em em mai a hmuh chu McGinn chuan goal-ah lo chantirin Aston Villa hi hma a hruai pui.

Darkar chanve chuang hret khelh a nihin Villa lamin Spurs hi an nawr a, Trezeguet chuan chance tha tak nei mahse goal-ah a chan tir thei lo. Half time hma chiahin Kane chuan chance tha em em mai a nei a, Ndombele-a’n box pawn chiah atanga ball a pek chu Kane hian goal hnaih teah lo tauh mahse a goal lo.

Kane hian chance dang a nei zui leh nghala, through ball a hmuh umin Villa goal lamah ball a khalha, chep tak karah goal-ah petin, goal a zawn lo hret. First half hi 1-0 a tihtawp zui a ni. First half hi a hmuhnawm hle a, team hnihte an inhnehtawkin an khel a nunga, an innawr tawn reng a tih theih.

Second half tan a ni a, minute khat pawh khelh tlin a nih hma hauhvin Spurs lam an hlauhawm nghal mawlh mawlha, mahse goal erawh an khung mai bik lo. Second half tan atanga minute nga khelh a nihin changtu nei lo Sissoko chuan box chhung dinglamah ball a changa, goal-ah shoot mahse goal a zawn lova,throw in turin ball a chhuak.

Minute nga khelh a ni leha, Kane chuan pet goal-na hun neiin goal-ah ball shoot mahse lo dan sak a ni. Darkar khat chuang khelh a ni a, Kane bawk hian Villa goal lamah tha takin bal chhuih pheiin, Villa defender Mings chuan tha takin a lo block.

70mins chuang hret khelh a nihin Tottenham chuan an si phurh an suta, Spurs tana goal khungtu hi an club chanchina an player manto ber Ndombele niin, box pawn atangin mawi em emin a chhuih luta. 1-1 a ni. Hemi hnu lawk hian range tha takah Tottenham hian free-kick an hmu a, Chrsitian Eriksen chuan free-kick atang hian ball a peta, pet tha hle mahse a aia tha in Villa keeper thar Heaton chuan a lo save.

Minute sawmriat chuang khelh a ni chhova, 87mins-ah Tottenham hian hma an hruai; Tottenham ball cross luh chu Villa captain Grealish chuan a changa, a thiante pass emaw pet chhuak mai lovin Grealish hian ball hi a khalh; Lamela chuan Grealish hi a ball khalh lai rawn chhuksakin goal lamah pet nghala , Mings chuan lo dangin Kane-a’n ball a chang zuia, Kane hian hnai set sawt atangin chiang takin a pet goal-a Spurs hian 2-1 in hma an hruai.

90mins khelh a ni a, Tottenham hian goal an dang an khung belh leha, goal khungtu hi England captain Kane bawk niin, a goal hnihna leh Spurs goal thumna a khunga, inkhel hi 3-1 in tih tawp a ni zuia, Tottenham hian point thum hlu tak an hlawhchhuak a ni.