Tottenham chuan Southampton captain hlui Pierre-Emile Hojbjerg chu an lalut ngei dawnin a lang tawha, Tottenham leh Southampton te inkarah hian inremna a thuphungin a awm tawh tih Sky Sports chuan a tarlang.
Tottenham hian Hojbjerg hi an lalut anga, Tottenham fullback Kyle Walker-Peters chu Southampton hian an lalut ve nghal bawk tura ngaih a ni.
Hojbjerg a man hi pound maktaduai 15 bawr vel a ni dawna, Walker-Peters a man hi pound maktaduai 12 bawr vel a ni dawn bawka, Walker-Peters hian tun season chawhnu lam kha Southampton-ah hian loan-in an lo khel tawh.
Player pahnihte hian an club thar tur hi zawm an chak tawh hle nia sawi a ni a, chuvang chuan mimal thilah buaina awm lo tura ngaih a ni a, official-a puan theih a nih thuai hmel.
Tottenham hian kumin January thla khan Hojbjerg hi an lo ngaihven tawh hle a, mahse eng mah tipuitling ta lovin, tunah erawh an in lakluh ngei a rinawm tawh.
Hojbjerg hi Southampton captain ni reng thin mahse lockdown lai khan media lamin an kawmnaah club tha zawk tana khelh a duh thu a sawi avangin Saints hian a captain nihna hlihsakin, an hralh zui dawn ta bawk a ni.