Tottenham chuan Southampton captain hlui Pierre-Emile Hojbjerg chu lakluh an tum meka, an lalut fel tep tawh niin Sky Sports chuan a tarlang.

Denmark midfielder Hojbjerg hian kumin kum tir lam khan club chungnung zawka khelh a duh thu a lo sawi tawha, hemi avang hian Southampton pawhin a captain nihna hlihsakin, James Ward-Prowse a hnenah an hlan tawh nghe nghe.

Hojbjerg hi a khel tlem chho hle a, Southampton pawh hian hralh chhuah ngei an tum meka, tunah hian Tottenham leh Everton te chuan Bayern Munich midfielder hlui hi an dawr mek.

Southampton hian Hojbjerg-a manah hian pound maktaduai 25 vel an duh nia sawi a ni a, mahse Tottenham hian pound maktaduai 15-in an dawr meka, an inkarah engtin tak nge inremna a awm dawn hriat nilo mahse, an inrem thuai erawh a rinawm hle.

Southampton hian tunah hian Tottenham player Kyle Walker-Peters chu loan-in an kawl meka, Southampton hian English fullback pawh hi a ngheta lak dan an ngaihtuah mek niin Sky Sports chuan a tarlang.

Everton chuan pound maktaduai 19-in Hojbjerg hi an dawr mek niin Sky Sports chuan a tarlanga bawka, mahse Hojbjerg hian Tottenham zawm a duh zawk niin thu an dawn thu Sky Sports hian an tarlang tel a ni.