10 Feb 2019 09:01

inkhel

Tottenham in hma an sawn belh zel

Tottenham Hotspur chuan Wembley Stadium-ah Leicester City an mikhual a, Spurs hi 3-1 in an chak a, pathumnaah an dinhmun chu an sawh ngheh belh zel a ni.

Mauricio Pochettino chuan kar laihawla UEFA Champions League an khelh tur hre rengin squad a siksawi a. Fernando Llorente, Oliver Skipp leh Danny Rose te chuan Lucas Moura, Erik Lamela leh Toby Alderweireld te chu an thlak a. Pochettino chuan European competition lama chet fuh loh a hlauh avangin heta a chhawr tur thenkhat chu a awltir a, kum 18-a upa Skipp pawh hian bul a tan theih phah a ni.

Kar hmasaa Manchester United an hneh loh tuma Leicester City tana khel pahnih chu an thlak danglam a, Jamie Vardy leh Mendy te chu chawlin, an aiah hian Rachid Ghezzal leh mi thar Youri Tielemans te chuan bul an tan ve thung a ni.

Tottenham (4-1-2-1-2): Hugo Lloris, Kieran Trippier, Jan Vertonghen, Davinson Sanchez, Danny Rose; Oliver Skipp; Harry Winks, Moussa Sissoko; Christian Eriksen; Son Heung-min, Fernando Llorente

Subs: Paulo Gazzaniga, Toby Alderweireld, Juan Foyth, Victor Wanyama, Serge Aurier, Kyle Walker-Peters, Lucas Moura

Leicester City (4-2-3-1): Kasper Schmeichel; Ricardo Pereira, Jonny Evans, Harry Maguire, Ben Chilwell; Youri Tielemans, Wilfred Ndidi; Rachid Ghezzal, James Maddison, Harvey Barnes; Demarai Gray

Subs: Danny Ward, Wes Morgan, Danny Simpson, Hamza Choudry, Shinji Okazaki, Jamie Vardy

Referee Michael Oliver chuan inkhel a tantir a, an khelh tirh atangin mual neitu Tottenham chu an che tha nghal mah zawk a, inkhel pawh an thunun chho nghal deuh mai a. Hetih rual hian Leicester pawh an awm mai mai lo hle a, goal thun theihna hun tha siam tumin tan an la nasa hle.

An innawr tawn nghal nual a, Spurs chuan ball an chang hnem zawk a, ball pawh an inpe hnem zawk daih bawk a, mahse goal erawh an thun thei mai lo ve ve a ni.

Minute 16-ah Son Heung-min chu Leicester chhungah Harry Maguire nen an innek a, Son hi a tlu a, Tottenham hian penalty an beisei viau laiin referee chuan Son chu tlu der tiin yellow card a pe a ni.

Minute 33-ah goal a lut a, corner an hlawh atangin Kieran Trippier chuan Christian Eriksen chu ball a pe a, Eriksen hian ball chu Leicester goal lamah a pet phei a. Heta ball kal hi Davinson Sanchez chuan goal chhungah chuan kawh deuhin a lo tauh lut a, Spurs chuan 1-0 in hma an hruai theih phah a ni.

Half time thlengin goal dang a luh belh lo a, team pahnihte hi chuti takin khelmualah an inthlau lo a tih theih a, goal thun theihna hun tha chu an nei dun ve ve a, mahse goal khat bak hi first half chhung chuan a lut ta lo a ni.

Second half an khelh tan leh phat atangin Spurs chuan goal thun belh tumin an nawr nghal a, hun tha pawh an insiam vat a, mahse an puitlin thei ta lo thung.

Minute 58-ah James Maddison chu Jan Vertonghen chuan Tottenham box chhungah a titlu a, hei vang hian referee Michael Oliver chuan Leicester chu penalty a hlawhtir a. Penalty an hlawh chiah hian Demarai Gray chu Jamie Vardy chuan a thlak a, Vardy hian penalty chu a pet zui nghal a ni.

Vardy chuan goal vei lamah chuan ball chu petin French captain Hugo Lloris chuan a lo dang thei hlauh a, 2014 hnua a vawi khatna atan Lloris hian Premier League bika penalty a dan leh hmasak ber a ni.

Hemi hnu deuh lawkah hian goal a lut a. Minute 63-ah Ricardo Pereira chuan ball pet chhuah a tum a, mahse ball hian Oliver Skipp chu a fuh a, Christian Eriksen chuan ball chu a lo dawng a. Eriksen hian ball chu tlem a siam rem a, box pawn atangin Kasper Schmeichel man theih lohin goal-ah chuan a thun a, 2-0 in hma an hruai theih phah a ni.

Christian Eriksen hian Premier League bikah box pawn atangin goal 20 a thun tling ta chiah a, 2013 a Premier League a khelh tan atangin box pawn atanga hetiang zat thun thei dang hi an la awm ve lo a ni.

Leicester City chuan goal thun ve ngei tumin tan an la zel a, an thawhrimna chuan rah tha a chhuah a, minute 76-ah goal an thun ve ta nge nge a. Ricardo Pereira leh Youri Tielemans te chuan ball an inpe a, a hnuah Pereira chuan Jamie Vardy chu tha zetin a pe ve leh a. A hma lawka hun tha vawi hnih ngawt bawhpelh tawh Vardy chuan hnai zet atangin a lo thun a, Leicester si phurh pakhat chu a sut thei ta hlauh a ni.

Jamie Vardy hian Premier League club lian paruk lamah goal 29 a thun tling ta chiah a, Liverpool lakah goal 7 a thun tawh a, Arsenal lakah goal 6 a thun tawh bawk a, Tottenham lakah hian goal 5 a thun tling ta chiah bawk a. Manchester City leh Manchester United lakah goal 4 ve ve thun tawhin, Chelsea lakah goal 3 a thun tawh bawk a ni.

An chhunzawm leh a, Leicester hian point hmuh ve ngei tumin a hma aia nasain Spurs chu an nawr zui a, goal thun an tum hle a. Goal thun theihna hun tha pawh an insiam nual a, mahse an thun thei tlat lo.

An si phurh sut tuma beihpui an thlak nasat avangin Leicester chuan an nawr phei vak a, an chetsual phah ta tlat mai a. Minute 91-ah Ben Chilwell ball pek fuh loh chu Moussa Sissoko chuan a lo pet chhuak a, hei hi Son Heung-min chuan lain Leicester goal-ah chuan a thun a, hun tawpah Tottenham hi 3-1 in an chak theih phah a ni.