11 Jul 2019 12:10

bakteaJr.

Mizo tlangval

​Tottenham-in Ceballos an dawr

Premier League club Tottenham Hotspur chuan Spanish club Real Madrid player Dani Ceballos chu an dawr mek niin Sky Sports chuan a tarlang.

Kum 22 mi ni mahse Ceballos hi Spain Under-21 tan a la khel pha a, thla hmasa maia U21 Euro-a Spain an champion pawh khan Ceballos hi an player tangkai ber zinga mi a ni.

Ceballos hian Santiago Bernabeu-ah kum li daih contract a la nei a, a release clause hi tarlan ni lo mahse sang hle nia sawi a ni bawk. Ceballos hian Spain chua ngheta chhuahsan a duh loh avangin Tottenham hian loan-a lakluh an tum niin sawi a awm a, Tottenham lo pawh hi Ceballos hian dawrtu a nei niin a lang.

Spanish chanchinbu Marca chuan Ceballos hi Champions League-a rorel lai Liverpool pawhin lakluh an duh tih a tarlanga, Liverpool hian Ceballos-a manah pound maktaduai 45 an theh chhuak huam nia tarlan a ni.

U21 Euro-a Spain a champion pui zawhin Ceballos hian season thara inkhelh tam a duh thu a lo sawi tawh a, Real Madrid-ah hian a duh anga a khelh tam theih a rinawm loh avangin loan-a a chhuah rih pawh a rinawm viau.

Ceballos hi central midfielder niin, Real Betis academy chhuak a ni a, kum 2017 khan Real Madrid chuan Betis atang hian pound maktaduai 16.2 sengin an lalut.

Real Madrid hi Tottenham player Christan Eriksen nen sawizawm an ni nasa hle a, Eriksen hian Tottenham chhuahsan a duh thu a lo sawi tawh nghe nghe. Hemi a nih avang hian Real chuan Eriksen an lakluh theih nan Tottenham lakah Ceballos hi an hmang tangkai lovang tih a sawi theih loh a ni.