Tottenham in Burnley an hneh lo

24th February 2019, 01:02AM

Burnley chuan Turf Moor-ah Tottenham Hotspur an mikhual a, he inkhelah hian Burnley chu 2-1 in an chak a, 13-naah an chhoh theih phah a ni.

Anni pahnih intawn hnuhnung pasarihah Burnley hian chak hmel an hmu thei miah lo a, vawi hnih an inhnehtawk a, a dang vawi ngaah Tottenham hi an chak a. Burnley in Tottenham an hneh hnuhnun ber chu 2009-10 season khan niin, season tawp niah 4-2 in an chak a ni.

Tottenham chu an match hnuhnung paliah an chak vek a, Burnley hi an hneh thei a nih chuan Manchester City nen an inthlauhna chu point 2 chiah a ni thei dawn a. Player pawimawh inhliam an awm nual laiin Mauricio Pochettino chuan striker inhliam Harry Kane chu a chhawr thei ve leh tawh dawn thung a ni.

Burnley hi tun hnaiah an che tha chho hle a, West Ham, Huddersfield, Fulham leh Brighton te chu an hneh a, relegation zone atangin an inthiarfihlim tan mek a. Sean Dyche pawlte hian him zui zel tur chuan chak belh an la mamawh reng thung a ni.

Tottenham chuan kar hnih kaltaa Leicester City an hneh tuma an khelhtir pali an thlak a. Inhliam vanga hun eng emaw chen chawl tawh Harry Kane chu a inkhel ve leh thei tawh a, Fernando Llorente chuan hmun a kian a. Toby Alderweireld, Juan Foyth leh Serge Aurier te chuan bul tanin Davinson Sanchez, Oliver Skipp leh Kieran Trippier te chu an chawl thung a ni.

Burnley chuan 3-1 a Brighton an hneh tuma an khelhtirte vek chu bul an tantir leh a, Dyche chuan a squad ngai nen chuan chak hmel hmuh leh a tum a ni. Amex Stadium a goal hnih thun thei Chris Wood chu tlar hmaah a awm a, Robbie Brady chu substitute bench lamah a awm ve leh tawh bawk a ni.

Burnley (4-4-2): Tom Heaton; Phillip Bardsley, James Tarkowski, Ben Mee, Charlie Taylor; Jeff Hendrick, Ashley Westwood, Jack Cork, Dwight McNeil; Ashley Barnes, Chris Wood

Subs: Matthew Lowton, Johann Gudmundsson, Robbie Brady, Ben Gibson, Peter Crouch, Joe Hart, Matej Vydra

Tottenham (3-4-3): Hugo Lloris; Juan Foyth, Toby Alderweireld, Jan Vertonghen; Serge Aurier, Moussa Sissoko, Harry Winks, Danny Rose; Christian Eriksen, Harry Kane, Son Heung-min

Subs: Erik Lamela, Victor Wanyama, Kyle Walker-Peters, Fernando Llorente, Paulo Gazzaniga, Lucas Moura, Ben Davies

Inkhel an tan a, Burnley chuan an va nawr deuh nghal a. A tir atang hian inkhel boruak a tang vak lo hle a, team pahnihte chu an innawr tawn ve thin a, mahse goal thun theihna hun tha an nei tam lo dun hle a ni.

First half chhungin goal a lut lo a, Harry Kane chu chawlhlawk hmaa goal thun teuh ber a ni a, box pawn deuh chiah atangin Burnley goal lamah ball chu a pet phei a, mahse goal pawn lamah ball chu a kal chiah a ni.

Ashley Barnes pawhin Tottenham goal lamah chuan ball a pet a, hetah pawh hian ball chu crossbar chungah a kal bawk a. Half time thlengin team pahnihte hian goal an thun thei ta lo ve ve a ni.

Second half an khel leh a, Tottenham chuan inkhel an thunun chho nghal a. Rei lutuk pawh an khelh hmain goal a lut a, mual neitu lam chuan hma an hruai hlauh a ni.

Minute 57-ah Burnley chuan corner an hlawh a, hei hi Dwight McNeil chuan a pet a. Ball kal phei chu Chris Wood chuan hnai deuh atangin Tottenham goal-ah chuan a lo tauh lut a, Burnley chuan 1-0 in hma an hruai theih phah a. Wood hian Premier League game 8 a khelh hnuhnungah goal 6 a thun tling ta chiah a, game hnuhnung 4 ah goal 4 a thun bawk a ni.

An khel chho leh a, Tottenham chuan minute 65-ah goal thun vein an si phurh chu an sut ve leh nghal a. Danny Rose chuan thehin Harry Kane chu ball a pe a, Kane chuan Burnley goal lamah ball chu tlanpuiin chep deuh atangin Tom Heaton man theih lohin goal-ah chuan a thun a. Kane hian Burnley nen an inkhelh hnuhnung vawi 3 ah goal 4 a thun tling ta chiah a ni.

Goal khat ve ve an thun hnu hian team pahnihte chuan hmahruaitu nih leh ngei tumin hma an la chho leh a. Hun tawp a hnai tan a, minute 83-ah goal a lut leh a, he goal hmang hian mual neitute chuan a vawi hnihna atan hma an hruai leh a ni.

Johann Gudmundsson chuan ball lain Spurs box chhungah chuan a luhpui a, goal lamah ball chu a pet a, mahse a pet fuh lo hle a. Heta ball kal hi Ashley Barnes chuan a lo thun a, Burnley chuan 2-1 in hma an hruai thei hlauh a ni.

Hun tawp thlengin goal dang a awm belh ta lo a, Burnley chu 2-1 in an chak a, Tottenham title beiseina pawh an tibuai pha hle a. Burnley hi 13-naah an chhoh theih phah a, relegation zone chu point 6 in an kalsan thei ta phawt a, Tottenham chu Manchester City aiin point 5 in an hniam mek a ni.

Copyright © inkhel.com 2024. All rights reserved.