Sky Sports thu dawn danin Tottenham chuan Manchester United nena sawizawm Sporting Lisbon midfielder Bruno Fernandes chu lakluh tumin an dawr mek.

Tottenham lam aiawhtute chuan Ningani khan Lisbon-ah Sporting hotute chu Fernandes-a chungchangah inbiakna neihpuiin an kawm niin tarlan a ni a, tun dinhmunah chuan an inrem thei dawn em tih eng mah a la hriat theih loh.

Tottenham hian Real Betis atangin Giovani Lo Celso chu lakluh tum viau mahse an la hlawhtling hleithei lova, Lo Celso aiah Fernandes hi an dawr ta zawk niin tarlan a ni a, Lo Celso hi an dawr chhunzawm lovang tih erawh a sawi theih chuang loh.

Manchester United chuan Fernandes hi an lalut ngei dawnin kar hmasa lam kha chuan a lang hmana, Sporting leh Valencia an intum zawhin Fernandes hian Sporting tantute chu mittui nen a thlah avangin United hi a zawm fel mai a rinawm hman.

Tunah erawh thu thar a awm a, United nen an inbiak fel thu sawi a awm thei lova, Tottenham lo langin, Tottenham hian an lakluh mai pawh a rinawm viaua, mahse inbiakna hi an la tan chauh avangin eng mah a la sawi theih chuang lo.

Betis chuan Lo Celso manah pound maktaduai 55 an phuta, Fernandes hi a tlem berah pound maktaduai 56 bawr vel a nih hmela, an man pawh a inang thuak dawn a ni.