British heavyweight boxing champion ni mek Anthony Joshua chuan kumin nipuiah IBF mandatory challenger Kubrat Pulev chu a hmachhawn ngei dawna, engkim ruahman fel a ni tawh.

Kumin June thla ni 20-ah AJ hian kum 38 mi Bulagrian boxer Pulev hi London-ah a hmachhawn dawna, an inhnekna tur hi Premier League club Tottenham home ground sak thar Tottenham Hotspur Stadium-ah a ni.

AJ hian Pulev-a lakah hian a WBA, IBF leh WBO world heavyweight title te a thap dawna, a chak a nih chuan nakkum kum tir lamah Tyson Fury nen an inhmachhawn lovang tih a sawi theih loh.

AJ hian nikum khan Andy Ruiz Jr lakah a WBA, IBF leh WBO world heavyweight title te hi hloh vek mahse nikum December thla khan a vawi hnih nan Ruiz hi hnekin hnehna AJ hian a changa, a title hloh te a la kir leh vek.

Pulev chuan AJ a tum tur chungchang sawiin, "Ka chak zia khawvel hnena lan tir na hun tha ka nei tur hi ka lawm takzet a ni,” a ti.

AJ hian kum 2018-a Alexender Povetkin nen Wembley Stadium-a an inhnek hnuah UK lama inhnek a nei leh tawh lova, kumin nipuiah a ram ngeiah a title kawl lai te humhima tum dawn.

AJ leh Pulev te hi kum 2017 khan Principality Stadium, Cardiff-a intum tura tih an lo ni tawha, mahe hemi tum hian Pulev hian a darah hliam a neih avangin a inhnukdawka, AJ hian Carlos Takam a hmachhawn ta zawk a ni.

AJ-a hmachhawn tur Pulev hi a theuneu lo hle a, European heavyweight champion hlui niin, fight 29 a neih tawhah vawi khat chiah a la tlawma, a tlawm awm chhun hi kum 2015-a Wladimir Klitschko a hneh loh tum kha a ni.