Tottenham hi trophy ka lakpui ngei ang: Mourinho

11th July 2020, 09:07PM

Jose Mourinho chuan Jurgen Klopp anga hun an pek phawt chuan Tottenham Hotspur chu trophy a lakpui ngei a rin thu a sawi.

Tottenham Hotspur manager Jose Mourinho chuan a contract a hman zawh hmain Spurs chu trophy lakpui theih a inbeisei thu sawiin, club thuneitute’n Liverpool manager Jurgen Klopp anga hun an pek theih phei chuan trophy chu la thei chiang tura a inngaih thu a sawi a ni.

Nikum November thlaah khan Tottenham chuan manager Mauricio Pochettino an ban a, a hmun ruak luah tur hian Jose Mourinho an la lut zui a. Portuguese coach Mourinho hian a club enkawl tawhte chu trophy a lakpui zel a, tuna a enkawl mek Spurs chu Premier League-ah pakuana an ni mek a ni.

Mourinho chuan 2015 kum atanga Liverpool enkawltu Jurgen Klopp hming sawi riin, club thuneitu lamin hun an pek thui theih zarah tunah chuan UEFA Champions League, UEFA Super Cup leh Club World Cup te pawh a lakpui theih tawh thu a sawi chhuak.

“Jurgen Klopp hian trophy la thei turin Liverpool hi eng chen nge a enkawl hman? Kum li, season li a enkawl hman a. Hemi hun chhung hian khawvela goalkeeper tha ber ber a lei a, khawvela centre-back tha ber ber a lei bawk a. Position danga khelte pawh khawvela langsar pawl an ni hlawm a ni,” tiin Mourinho chuan a sawi.

“He lai hmunah hian kum thum chhung atan contract ka ziak a, ka contract hi ka ngaipawimawh hle a. Kum thum chhunga ka contract ka hman lai hian trophy kan lak theih ngei ka ring. Kan la thei ta lo a nih a, ka chhuah hnua an la thei ta a nih pawhin ka lawm tho ang,” a ti bawk.

A sawi zelnaah, “He club tan hian theihtawp ka chhuah a, an tan ka thawk mek a, keima tan engmah ka ngaihtuah ngai lo a. Ka rilru put dan te, ka duh dan te chu hmana mi nen a la inang vek a, hetiang zawng zawng karah hian club tluka dah pawimawh leh dah hmasak hi ka nei lo,” a ti.

2008 League Cup trophy an lak hnua trophy la leh ta miah lo Tottenham Hotspur chuan tun hnaiah chuan player man to tak tak lei an tum loh thu Mourinho hian a sawi a. Chutih rulain transfer window inhawn hunah chuan an squad tichak tura player an siksawi ngei a rin thu a sawi a ni.

Copyright © inkhel.com 2024. All rights reserved.