Tottenham manager Mouricio Pochettino chu tun hnaiah Manchester United zawm tur angin media-te chuan an sawi nasa hle a, mahse Argentine manager chuan Tottenham-ah a hlim thu a sawi ve thung.

Tun hnai lawka kum nga daih contract thar ziaktu Poche chuan, “Tottenham hian hlutna mi pe a, he hmunah hian ka hlima, a chhan chu mi hriat kan hlawh zual mek a ni. Chairman Daniel Levy-a’n kum nga chhung atan ka contract a pawhsei khan, kan hun paltlang mekah hmasawnna hmuin rinna a nei tih a langa, kan za vai hian he club enkawl tura mi dik takte kan ni.

“Thu leng vel lamah beng ka chhit a ngai lova, a pawimawh ber zawk chu tlangnel takin i awmna hmunah khan i awm thei em tih zawk hi a ni. Hma kan sawn zel a, kan hmasawn tum dan leh kan hmasawn dan erawh club dang ang kan ni lo maithei. Kan kal hmang a danglam deuha, khelh that mar pat kan tuma, kum tina hmasawn zel kan tum bawka, chu chu a tawk em tih kan hmu chho zel ang.

“Tun dinhmunah chuan Manchester City chu midang zawng zawng chungah an leng tih a hriat hle a, City dawtah Liverpool an ni leh. A pawimawh ber chu theihtawp chhuaha beih zel a ni a, hmun tha taka awm a ngai a ni. Club dang pawhin top four-a awm chu hlawhtlinna nasa tak an lo tih ang chiahin kan tan chuan top four-a awm chu hlawhtlinna nasa tak a ni ang. Kan tum hmasak ber chu khelh that mar pat renga top four-a awm tum reng hi a ni,”a ti.

Tottenham hi tunah pathumnaah an awm meka, Manchester City leh Liverpool chiah an pha tawh lo. Nipui bazar laiin player lakluh pakhat mah neilo mahse Chelsea, Arsenal leh Manchester United chungah an leng mek a ni.