Nikum nipui bazar inhawn lai khan Harry Kane chuan Tottenham chhuahsanin Bayern Munich a zawm.

FC Bayern-in Kane an leina man kha £82million vel a ni a, a man hi £100million pawh a kai chho thei dawn niin a lang.

England striker Harry Kane chu Tottenham Stadium-ah a kir leh dawn. August ni 10-a Pre-season friendly match-ah Bayern Munich chuan Tottenham an tlawh dawn.

He friendly match hi Visit Malta Cup a ni dawn a, a chak zawk zawkin Cup an chawi dawn a ni.

England international hi Tottenham tana goal khung hnem ber a ni a, kum 19 zet English club-a hun a hman hnuah Bayern Munich a pan. Spurs an tlawh tuma hnehna an chang a nih chuan Kane chuan Tottenham Hotspurs Stadium-ah trophy a chawi dawn tihna a ni.

Tottenham stadium-a kir leh hi Kane-a tan chuan a danglam khawp ang le. Kane bakah hian Spurs player hlui Eric Dier pawh a inlan a rinawm. Ani hian loan-in FC Bayern a zawm mek a, tun season zawh rualin Bayern Munich-ah hian contract a ziak dawn nia report a ni.

German a pan hnuin Kane a khel tha hle, Bundesliga game 26 atangin goal 31 a khung a, assist vawi 7 a nei tling tawh bawk.

Kane hian goal khung hnem viau mah se, trophy chawi lovin season a khar mai ang tih erawh a hlauhawm hle.

DFB-Pokal atangin Saarbrucken chuan an pet chhuak a, Bundesliga lamah pawh Bayer Leverkusen an thlauhna chu point 10 lai a ni bawk.

Sawmna : Website advertisement hi min click sak ve thin turin kan sawm a che u.

Champions League chu an beiseina neih chhun a ni ta mai a, UCL-ah Bayern Munich hian Premier League hmahruaitu Arsenal an hmachhawn ang.