Torreira zarah Arsenal an chak hram

09th December 2018, 04:12AM

Arsenal chuan Emirates Stadium-ah Huddersfield an lo mikhual a, hun tawp dawn hnaiha Lucas Torreira goal thun hmangin mual neitute hi an chak a, game 21 chhung chu hneh loh nei loin an kal mek a ni.

Kar laihawlah Arsenal leh Manchester United te chu 2-2 in an inhnehtawk a, hneh loh nei loin game 20 chu an kalna a ni ta a, November 2007 hnua chak loh nei loa an kal tluan rei ber a ni a. Huddersfield ve thung chu Premier League match an khelh hnuhnun 10 ah vawi khat chiah an la chak ve thung a. Arsenal leh Huddersfield inkhelh hnuhnun 10 ah Arsenal chu a tlawm zawkah an la tang miah lo a, season hmasa khan Arsenal chu 5-0 in an chak a ni.

Unai Emery chuan Nilainia Manchester United nen an inhnehtawk tuma a khelhtir thenkhat chu a thlak a, inhliam vangin Rob Holding leh Aaron Ramsey te chu an tel thei lo a, Alex Iwobi pawh substitute bench lamah a thu a. Stephan Lichsteiner, Granit Xhaka leh Alexandre Lacazette te chu bul a tantir hlawm a. Inhliam vanga hun rei tak chawl tawh Laurent Koscielny pawh substitute bench ah a thu ve tan tawh a ni.

David Wagner pawhin kar laihawla Bournemouth an khelh tuma pathumte chu a thlak danglam a, Philip Billing chu hrem vangin a tel thei lo a, Florent Hadergjonaj leh Erik Durm te chu bench lamah an thu a, an pathum aiah hian Tommy Smith, Chris Lowe leh Danny Williams te chu an lut a. Danny Williams hian March thla hnu lama Premier League-a bul a tan leh hmasak ber a ni.

Arsenal XI (3-5-2): Bernd Leno; Stephan Lichtsteiner, Shkodran Mustafi, Sokratis; Hector Bellerin, Matteo Guendouzi, Lucas Torreira, Granit Xhaka, Sead Kolasinac; Pierre-Emerick Aubameyang, Alexandre Lacazette

Subs: Petr Cech, Eddie Nketiah, Laurent Koscienly, Mohamed Elneny, Alex Iwobi, Henrikh Mkhitaryan, Nacho Monreal

Huddersfield XI (3-4-1-1): Jonas Lossl; Mathias Jorgenson, Christopher Schindler, Terence Kongolo; Tommy Smith, Aaron Mooy, Jonathan Hogg, Danny Williams, Chris Lowe; Alex Pritchard; Laurent Depoitre

Subs: Ben Hamer, Elias Kachunga, Ramadan Sobhi, Isaac Mbenza, Juninho Bacuna, Erik Durm, Florent Hadergjonaj

Emirates Stadium a inkhelah hian goal khat chiah a lut a, hun tawp hma deuhin Lucas Torreira chuan mawi zet maiin goal awm chhun hi a thun a. Arsenal chuan inelna hrang hrangah a zawnin game 21 chhung chu chak loh an nei lo a. An game hmasa bera Manchester City laka 0-2 a an tlawm hnuah Arsenal hian Premier League game 14 an khelhin goal an la thun ziah a ni.

Inkhel tan tirh atangin Arsenal chuan ball an chang hnem nghal a, inkhel pawh an thunun nghal viau a, mahse goal thun theihna hun tha erawh an insiam thei mai lo thung a. Tun season chhunga Premier League game 15-ah Arsenal hian first half ah hma an la hruai miah lo a, half time a thlenin vawi 11 chu an in draw a, vawi 4 ah chuan si an phur a, second half ah an che tha deuh chauh thin.

Mual neitu lam hian inkhel chu thunun viau mahse goal an thun thei lo hle a, half time thlengin khawi lam mah hian goal an thun ta lo a. Bournemouth chuan hlauhawm taka chet an nei lo hle a, Arsenal tan Alexandre Lacazette leh Pierre-Emerick Aubameyang te chuan goal thun theihna hun tha an bawhpelh nual a ni.

Second half an khel leh a, a hma ang bawkin Arsenal chuan inkhel an thunun leh tho a, mahse first half nen a danglam tam lo hle a, goal an thun thei chuang tlat lo.

Hun tawp a hnai chho zel a, Arsenal chuan goal thun tum viau mahse an tum an puitlin thei tlat lo a, Premier League game an khelh hnuhnung 7 ah vawi 5 an draw dawn emaw a tih theih hman hial a, mahse goal a lut ta hlauh a ni.

Matteo Guendouzi chuan Aubameyang chu ball tha deuh mai a pe a, hei hi Aubameyang chuan a lo dawng a, goal lamah pet mahse an lo dang a. Ball kal zel chu Auba bawk hian lain Lucas Torreira lamah chuan a pe phei a. Torreira chuan mawi zetin a lo thun a ni.

Hei bak hi goal dang a awm belh ta lo a, Arsenal chuan a chung lama dinhmun sawh ngheh zel an tumna chu an tihhlawhtlin belh leh ta a ni.

Copyright © inkhel.com 2024. All rights reserved.