Mizoram Police FC chuan MPL 4 Round hnuhnung berah Bethlehem Vengthlang FC goal awm lovin an inhnehtawkpui a, Mizoram Premier League atangin a vawi khat nan Mizoram Police FC te an relegate ta.
Mizoram Police-te hi thangthar ten kan hriat phak china top flight football khel char char thin an ni a. Vawiin tlai khan Luangmual FC chuan Chanmari FC 4-0 laiin an hneh lo. Mizoram Police FC an chak a nih ngat chuan Luangmual FC an relegate dawn a, anni erawh an him hlauh dawn. Chutih laiin Mizoran Police FC-in chance engemawzat nei mahse hnehna an chak zo ta lo a ni.
Khelh 14 atangin Mizoram Police FC chuan 12 points an nei a, a mawngphah an ni a, Luangmual FC chuan point 13 an nei a, 7-na an ni ta a, playoff an khel anga, Zo United leh Chanmari West FC te an him ta a ni. Mizoram Police FC engtin nge an awm zel dawn ? A sawi lawk theih loh. 1st Division an khel ve dawn nge ? Mizoram Police hian Football team an titawp tawh mai dawn ? An hotute rel dan dan a ni tawh dawn a ni.
Mizoram Police FC 0-0 Bethlehem Vengthlang FC
Mizoram Police FC XI : Andrew Lalhmingliana, Lalropuia, Lalhmunmawia, JS Lalruatthanga, Lallawmzuala, Lalramtharmawia, V Laltanpuia, Lalfakzuala, Lalruatpuia, Lalfakawma, Lalnunmawia
Bethlehem Vengthlang FC XI : Lalmuansanga, Joseph Lalsanglura, Lalmuanawma, K Lalthathanga, Lalruatdika, Michael L khiangte, Vanlalzuia Hnamte, Zaithanmawia, Lalruatfela, MS Dawngliana, Lalrammawia, Frencis Rambeiseia, Ramdinzela
Bethlehem Vengthlang FC hi an chak emaw chak lo emaw, McDowell's No 1 Soda Mizoram Premier League semi final a khel dawn hrim hrim, chutih laiin an match hnuhnung berah chak an la tum em em bawk a, hei hian Mizoram Football a thianghlim zia leh match fixing ang chi kha a awm ve loh zia a ti lang chiang kher mai. Chutiang bawkin vawiin tlaia khel Chanmari FC pawh kha semi final khel tur an ni chiang tawh a, chuti chung chuan 4-0 laiin Luangmual FC an hneh tho a nih kha.
Bethlehem Vengthlang FC lamin chance an nei hmasa a, Fela pek tha zet chu Michael-a chuan pet nghalin, Mizoram Police FC goal bar a pet per. Darkar chanve an khelh tlin hma hretin Lalnunmawia chuan goal khungna chance a nei a, box pawn atanga a shot tha zet chu Bethlehem Vengthlang FC goalkeeper Lalmuansanga chuan tha zetin a lo dang. Hemi hnu lawk hian Zaithana chuan box pawn atangin tha zetin a shot a, Mizoram Police FC goalkeeper Andrew-a chuan ropui takin a lo dang bawk a.
Mizoram Police FC hian an nawr hle a, chance hlauhawm pawh an nei zauh zauh reng, chutih laiin Bethlehem Vengthlang FC pawhin chance hlauhawm tak tak an nei ve reng bawk a. Second half-ah Mizoram Police FC-in goal khungna chance tha tak vawi hnih an nei a, Nunmawia chuan pen 8 vel atangin a pet over a, chutiang deuh chiahin hun tawp dawn tak takah Mamawia cross chu Fakzuala chuan pen 6 vel atangin a pet goal lo bawk a ni. Mizoram Police FC goalkeeper Andrew-a chu man of the match-a thlan a ni.
Mizoram Police player tha tak takte hmel MPL-a kan hmu tawh lo tur hi a pawi hle mai. Club dang chu nise player thate MPL khel tur club-ah an lut leh zel thei a, chutih laiin Mizoram Police FC player-te erawh an chhuak ve mai mai thei bawk si lo. Kum danga team tha ber pawl ni thin kumina heti em em a an han che chhe ta mai hi a mak a. Aizawl FC chuan an player tha pahnih Valpuia leh Biaktea loan-in an hawh sak a. Anni pahnih an awm loh avanga hetiang em ema tlahniam tur niin an lang lo. An player senior-te an liam ve zel a, tun season chu an insiksawi ve nasa em em bawk a, chu chu an tuar pawh a ni thei e. Engpawh nise engtikah emaw chuan top flight football-a an rawn kir leh ngei lo beisei teh ang.