Arsenal chuan Premier League inkhelah Watford an hneh a, Arsenal hian Chelsea lehpelin pangana atangin palinaah an chho va, Chelsea ai hian khelh khatin an khel tlem zawk bawk.

Arsenal hian a zawnin Champions League chu season hnih an khel tawh lova, an manager lakluh thar Unai Emery hnuaiah erawh season thara Champions League khel turin an in pet tlin ngei a rinawm chho viau.

Pierre-Emerick Aubameyang-a goal awmchhun hmanga Watford an hneh zawhin Emery chuan season tawpah a sang pali zinga an tel leh tel loh chu an kutah a awm tawh thu a sawi. Emery chuan, “Tuna kan dinhmun hi a pawimawh em em a, top 4-ah kan tel duh a nih chuan kan kutah a innghat tawh.

“Watford lakah inkhel kan thunun zawkin ka hria a, player pakhatin kan tam zawk bawk nen kan chan kha a tha a, point thum kan hlawhchhuak thei kha a lawmawm hle bawk a ni,” a ti.

Sawi zelin Emery chuan, “Watford khan tharum an ngah em em a, an supporter-te chawp khan min zim tawt nasa bawk. Player pakhatin tlem zawk mahse an khel tha a, min nawr na em em bawk a ni,” a ti.

He inkhelah hian Watford captain Troy Deeney chu 11mins-ah hnawhchhuah a ni a, Lucas Torreira nen ball an inchuhna lamah Deeney hian Torreira hmaiah a kiu in a nghawk a, referee chuan a hnawtchhuak nghal.

Emery chuan Deeney hnawhchhuah a nih chungchang tlem sawi belh lehin, “Minute sawmkaw chhungin thil tam tak a thlenga, Deeney leh Torreira-te inkarah khan eng nge thleng ka hmu chiah lo. Mahse referee-in a hna tha takin a thawk a, point thum kan hlawhchhuak thei kha a pawimawh ber a ni,” a ti.