06 Jun 2019 06:22

inkhel

Tokyo Olympics zawhah ka chawl ang: Mary Kom

MC Mary Kom chuan 2020 Tokyo Olympics neih zawhah boxing chu chawlhsan a tum thu a puang.

Indian boxer ropui Mary Kom hian inhnek a chawlhsan hmain Olympic gold medal lak theih a duh thu a sawi thin a. Tunah hian 2020 Tokyo Olympics atan a inbuatsaih tan tawh a, hetah hian gold medal lak theih ngei a tum hle.

Kum 18 chhung zet boxing khawvel a luhchilh tawh a, hemi chhung hian World Championships gold medal paruk a lak tawh bakah Olympic bronze medal leh Asian Championships medal panga a la tawh bawk a. Boxing pawn lamah hian politics lamah a inhmang mek a, tunah hian Rajya Sabha MP a ni mek a ni.

Mary Kom chuan, “2020 Tokyo Olympic hnuah chuan chawlh ka duh ve tawh a, ka chawlh hma ngei hian ka thil tum ber tur chu India tana gold medal lak hi a ni a. A bik takin Olympic gold medal lak hi ka duh tak zet a ni,” a ti.

2012 London Olympics-ah khan Mary Kom hian flyweight category-ah bronze medal a dawng a, tunah chuan gold medal dawn theih ngei a duh thu sawiin, chutiang ti thei tur chuan theihtawp chhuahin a inbuatsaih tan niin a sawi.

“India ram tana medal la thei turin theihtawp ka chhuah thin a, a theih phei chuan gold medal lak ngei ka tum thin a. Olympic qualifying atan ka inpuahchah bakah World Championship atan pawh ka inbuatsaih chho dawn a. Tun tumah chuan Olympic gold medal lak theih ngei ka duh a ni,” tiin Mary Kom chuan a sawi a ni.

Kum thar lawkah Olympics neih a ni tawh dawn a, hetih lai hian boxing khawvel chu a buai nuaih mai a. International Olympic Committee (IOC) chuan International Boxing Association (AIBA) chu Tokyo Olympics-a inhnamhnawih thei lo turin an phuar mek a ni.

International Olympic Committee chuan Olympic qualifier neih hun tur chu an siamtha dawn tih sawiin, kum thar January leh May inkarah chuan tih theih an inbeisei thu an sawi a. Calendar an siamthat bakah weight category hrang hrang pawh an khawih danglam maithei niin an sawi.

Manipur boxer Mary Kom chuan qualifier neih hun tur an sawn hla a nih chuan a tan a tha daih zawk niin a sawi a. Hun thawl zawk a nei thei ang a, a tan gold medal lak theihna hun a inhawng zau zawk dawn niin a sawi bawk.

“Qualifier neih hun hi an sawn hla a nih ngat chuan ka tan a tha zawk daih dawn a, an tih har poh leh inpuahchahna hun ka nei hnem dawn tihna a ni mai,” tiin Mary Kom chuan a sawi.

A sawi zelnaah, “Training hi ngawrh takin ka nei chho mek a, Olympic chauh ka tinzawn lo a, inelna dangte pawh ka tinzawn tel vek tho a. World Championship-ah chuan ka khingpui turte ka hre chiang ang a, an chakna leh chak lohna te ka zir chiang hmasa vek dawn a. Theihtawp chhuahin ka inbuatsaih ang a, qualifying an tih tlai dawn phei chuan ka tan hun a tam lehzual dawn a ni mai,” a ti bawk.

Rio Olympics-ah a tel thei ta lo a, hemi hnu hian Mary Kom chuan a telna category a thlak zui a. December 2016 khan 48 kg category-ah a awm a, tunah chuan 51 kg category lamah a insawn leh tawh a ni.