Stephen Curry chuan Team USA a tel ngei a duh thu sawiin, Tokyo khawpuia Olympic Games neih hunah tel ngei a tum thu a sawi.

Golden State Warriors guard Stephen Curry chuan tun hnaia ESPN in an kawmnaah, “Tokyo Olympics-a tel theih ngei hi ka tum hle a. Tun atangin chuti zawng chuan rilru ka siam rem nghal a, inhliam palh a, tel theih loh te pawh a hlauhawm nghal rum rum mai,” a ti.

Curry hi Olympics-ah hian a la tel ngai miah lo a, kum thara Tokyo khawpuia Olympic Games-ah a tel thei a nih chuan a vawi khat telna tur a ni dawn a. Hetiang thil tawn hriat hi a chak thu a sawi nasa hle.

“Ka tel chak tak zet a, Olympic team-ah hian vawi khat mah ka la tel ngai lo a. World Cup championship gold medal team-ah hi chuan vawi hnih ka lo tel tawh a; amaherawhchu, Olympics boruak lam tawn hriat ve ngei tluka chak hi ka nei lo a, kum tharah chuan ka duh ang hi a taka a thlen theih ngei ka beisei,” tiin Curry chuan a sawi chhuak.

Tun hnaia FIBA World Cup khelh zawh takah Team USA chu pasarihna an ni a, an ram chet chhiat ber tum a la ni a. An team member tura beisei player langsar deuhte chu an inhnuhdawh nual avangin member turte hi chawpchilh deuhin an fawm khawm leh hnuhnawh a ni.

FIBA World Cup-ah hian an chet chhiat em avangin Team USA managing director Jerry Colangelo chuan an ram team tana pen chhuak duh lote chu an theihnghilh dawn loh thu a sawi a. Tuna Stephen Curry a tawng chhuah takah chuan Team USA ah hian an teltir mai a rinawm hle.

American team chuan khawvel huap basketball inelnaah ro an rel chhunzawm theih a rin thu Curry chuan a sawi a. Portland Trail Blazers guard Damian Lillard pawhin tun kara Sydney an tlawh tum khan Team USA member nih ve ngei a duh thu a sawi chhuak bawk a ni.