Serie A inkhelah champion lai Juventus chuan Juventus Stadium-ah Inter Milan lo mikhualin, mual neitu Juve hian si khat faiin hnehna an changa, Serie A season kal mekah hneh loh an la tawng lo.

Goal awmchhun hi Croatian striker Mario Mandzukic-a thun a ni a, 66mins-ah goal pawimawh tak hi a tauh lut. Juve hian khelh 15-ah point 43 an hlawhchhuak tawha, an tumpuite vawikhat an inhnehtawkpui bak chu point hloh an la nei lova, hma an hruai chiang hle. Inter Milan hian khelh 15 atangin point 29 hlawhchhuak ve tawhin pathumnaah an awm mek thung.

Juventus 1-0 Inter Milan

(Mandzukic 66’)

PLAYER RATINGS

Juventus - Szczesny 5, De Sciglio 6, Bonucci 6, Chiellini 8, Cancelo 8, Matuidi 8, Pjanic 6, Bentancur 7, Dybala 6, Manduzkic 7, Ronaldo 6. Subs: Costa 6, Can 5.

Internazionale - Handanovic 6,Vrsaljko 5, Skriniar 5, Miranada 6, Asamoah 5, Brozovic 7, Gagliardini 5, Joao Mario 4, Politano 7, Icardi 5, Perisic 5. Subs: Valero 4, Keita Balde 5, Martinez 5.

Match Report

Team hnihten inkhel hmuhnawm tak min hlui a, inkhel tan atanga hun rei a liam hma in, Cristiano Ronaldo-a’n mual veilam atanga box chhunga a cross tha tak chu Paulo Dybala chuan lo tauhin, hlauhawm teuh hle mahse goal a zawn lo. Hemi hnu lawk hian mual veilam tangin box chhunga awm Dybala chu ball pek a ni a, Dybala hian tha takin pet mahse Inter keeper Handanovic chuan a kut hmawrin a lo khawih hman. Dybala chance neih hnu lawkah Inter right back Vrsaljko chuan hla tak atangin Juve goal-ah a pet a, mahse Juve keeper Szczesny tan a buaithlak lutuk lo.

Darkar chanve khelh a nih hma chiahin Inter lamin chance tha lutuk an hlah a, goal ban an pet per. Mual veilamah Politano chuan ball khalhin, box chhunga awm Mauro Icardi a pe chhova, Icardi hian box chhunga rawn tlan lut Gagliardini chu tha taka ball lo pe ve lehin, Gagliardini hian goal-ah a pet zui a, Szczesny chuan save thei lo mahse goal ban a fuh a, Inter an vanduai hle. Half time hma minute sawm vel a la awmin, mual veilam atanga lei hrulah cross ball lokal chu Bentancur chuan lo petin, Brozovic chuan a lo dang hman. Hemi hnu lawk hian Juve –in corner an hmu a, corner atanga ball vawrh luh chu Juve captain Chiellini chuan lo tauhin, goal chung chiahah a kal. Chance ngah dun hle in, inkhel pawh hmuhnawm hle mahse first half-ah goal khung thei an awm lova, 0-0 in first half tihtawp a ni.

Second half tan a ni a, Inter-in chance an nei leh nghal. Anmahni box hma lawkah Juve hi ball inpe in, Blaise Matuidi chuan ball a la sualin, hei hi Inter Milan-in hman tangkai tum viau mahse goal-ah an chantir thei lo. 66mins-ah goal a lut ta nge nge a, mual veilamah Juve full-back Joao Cancelo chu ball pek a ni a, Cancelo hian box pawn chiah atangin ball cross lutin, Mandzukic chuan mawi takin, hnai set sawt atangin a lo tauh luta, goal awmchhun leh Juve chakna goal ni bawk chu a thun. Team hnihte hian half chance nei zui zeuh zeuh reng mahse goal a luh belh tawh lo va inkhel hi 1-0 in a tawp ta a ni.