Tlanchak hmingthang Bill Rodgers leh rualbanlo Bill Broadhurst

05th January 2016, 06:01AM

1981 July thla kha a ni a, Pepsi Challenge 10,000 meter Marathon chu Omaha, Nebraska-ah neih a ni a. He intlansiakah hian rualbanlo (a thluaka harsatna a tawh avanga pangkhing zeng) Bill Broadhurst chuan tlan a tum ve tlat mai. Infiammi 1,200 zingah chuan a ding ve ta ran mai a.

Bill Broadhurst hian pakhatna a ni dawn lo tih a chiang lutuk, a tum ber zawk erawh tlanchak hmingthang Bill Rodgers hmuh a tum vang zawk a ni a. Intlansiak tirah emaw a tawpah emaw tal a hmuh ngei a inbeisei tlat. (Bill Rodgers hi marathon record ropui tak a neih avangin a lar em em a, Boston Marathon-ah vawi 4 lai pakhatna a ni a, New York City Marathon-ah pawh hming a lo chher tawh hle bawk a ni).

Intlansiak chu an tan ta a, Bill Rogers chu a duk pur pur, 28:36.3 chhung lekin a thleng ta mai, pakhatna a nih mai bakah record hemi tum hian a siam nghe nghe. Chutih laiin Bill Broadhurst erawh theih tawpin a tlan a, tlan kawng a thui, a taksain a zo tawh lo, na a tuar nasa tawh hle.

Darkar hnih dawn hun a hmang ta, a tlanpui zawng zawng an thleng tawh. Bansan mai a tum a, mahse intlansiaknaah chuan a tlan ve tawh laklawh si a, Bill Rodgers hmuh a tum tlat. Intlansiakna hrui zamte chu an lo phelh tawh hlawm a, tin, mipui pawh an tin tawh, kawng sirah chuan zawi muangin a kal a. A tawpah chuan finish line a hmu ta.

Mi zawng zawng an hawng vek tawh emaw a tih laiin mi tlemte an lo la awm a, theih tawpin Bill Broadhurst chu a tlan zel. Tichuan finish line a thleng ve ta. Chutah a ngaihsan em em Bill Rodgers ngei mai chuan a lo hmuak chu niin, hlim takin Bill Rodgers chuan a lo lawm a, a medal chu hlanin,"Kei aiin i thawkrim zawk, gold medal hi i phu a ni," tiin a awrh tir ta a ni.

Pathian rawngbawlna kawng, intlansiakna thaah hian hnufum bik emaw mite aia thalo bik riaua inhriat chang i nei thin ang. Kan tlanchak emaw tlan muang emaw, Kan Lal Isua chuan he intlansiakna kawng bumboh tak leh harsa tak hi a lo tlan chhuak tawh a, finish line-ah min lo hmuak mek. A tawp kan thlen ve hun nghakin min lo chang reng a ni.

Nang erawh chu engkimah fimkhur la, hreawm tuar la, Chanchin Tha hriltu lam hna thawk la, i rawngbawlna kha hlen rawh. Thih thlengin rinawmin lo awm rawh, tichuan nunna lallukhum ka pe ang che.

Thu lakna : Short Sermon : Rawngbawlna hlen – Upa Zonunmawia @ rktp.info

Copyright © inkhel.com 2024. All rights reserved.