Champions League quarter final inkhelah Paris Saint-Germain chuan 2-1 in Atalanta an hneha, he inkhela Man of the Match lawmman dawngtu PSG forward Neymar chuan a tir atang khan tlak an tum loh sa thu a sawi.

Neymar hian chance tha tak tak hlah mahse a khel tha hle tho a, goal hnih an khung danah pawh a thawhhlawk ber zinga mi a ni ve ve.

Atalanta hian Mario Pasalic-a goal hmang hun tawp lam thleng hma an hruaia, 90mins hnuah PSG tan Marquinhos leh Choupo-Moting te chuan goal khungin semi final an luta, semi final ah hian RB Leipzig emaw Atletico Madrid emaw an hmachhawn dawn.

Neymar chuan, “Kan tan zan lawmawm a ni mahse, a hautak hle bawk. Atalanta khan team tha tak an ni tih kan hria a, season tluanin an khel tha in, Champions League-ah pawh mi tam tak an barakhaih tawh.

“Tlak lam kan ngaihtuah lo hrim hrima, haw mai kan la tum lo. Final khelh ngei ka duha, chu chu tu man ka rilru min thlak danglam sak dawn lo. Tharum ngah takin Atalanta kha an khela, min nawr dawn tih pawh kan hria.

“Kan hlawhtlinnaah hian kan lawma, game tha tak kan khela, rilru lamah nghawng a neih nasat em avangin hahchawlh erawh kan mamawh hle dawn. Game tha tak kan chhawpchhuaka, a harsa a, a dangin min hmuak bawk. Game tha tak khel leh turin kan inbuatsaih a ngai a ni,” a ti.