McDowell's No 1 Soda Mizoram Premier League Round 13 khelh zawh a ni ta a, Round 13-a match hnuhnung berah Mizoram Police FC chuan 2-1 in Luangmual an hneh.
Mizoram Police FC tan V. Laltanpuia leh Lalfakawma ten first half-ah goal an khung a, second half-ah B. Malsawmzuala chuan Luangmual FC tan goal khung mahse Luangmual FC hian an si phurh an rul zo thei ta lo a ni.
Luangmual FC 1-2 Mizoram Police FC
(B. Malsawmzuala 85') (V Laltanpuia 37', Lalfakawma 40')
Luamgmual FC: Malsawmdawngzela, Hmingthanzauva, Dinthangpuia, Daniela Pautu, Vanlalruata, Lalchhanchhuaha, F. Lalmuansanga, Lalthawmmawia, David K Hmingthanga, B. Malsawmzuala, Rosangliana.
Subs: Isak Lalmuanpuia, Lalruatpuia, C. Lalnunpuia, Lalmuanawma.
Mizoram Police FC: Andrew Lalhmingliana, Lalropuia, Lalhmunmawia, JS Lalruatthanga, Lallawmzuala, Lalramtharmawia, V. Laltanpuia, Lalfakzuala, Lalruatpuia, Lalfakawma, Lalnunmawia.
Subs: J. Vanlalhriata, TC Vanlalhruaia, Samson Lallawmawma, B. Zoramthanga, Lalrinchhana, Lalbiaknunga, Lalhriatzela, Lalhriatpuia, Lalsangbera.
Mizoram Police FC hi a mawngphah an la ni chhunzawm zel a, hetih lai hian relegate an pumpelh thei tlat mai. An match hnuhnung berah Bethlehem Vengthlang FC an tum dawn a, anni hi an chak emaw chak lo emaw, pahnihna emaw pathumna emaw an ni tawh dawn hrim hrim a. Semi final-ah Chanmari FC nen an inhmachhawn dawn chiang tawh. Chuvang chuan Round hnuhnung ber hi hahdam taka khelh an tum ngei maithei. Hei tak hi Mizoram Police FC tan chance tha tak a ni thei dawn.
Mizoram Police FC hian Round 14-ah Bethlehem Vengthlang FC hneh ta se, Luangmual FC-in Chanmari FC an hneh lohva, Chanmari West FC leh Zo United FC an chak loh ve ve bawk chuan point 14 nei team thum an awm dawn a. Tin, Luangmual FC leh Chanmari FC an inhnehtawk a nih phei chuan hetiang condition chiah hian thil thleng tase, point 14 nei team 4 lai an awm thei dawn tlat mai le. Head to Head a en theih tawh dawn lohva, Mizoram Police FC hian chance tha tak an nei thei dawn a ni.
Tin, Mizoram Police FC hi chakin Chanmari West FC hi chak lo ta se. Point 14 ve ve team hnihte hian hmu ta selang. Head to head-ah Mizoram Police FC an tha zawk a, Chanmari West FC tan relegate theih a ni dawn tlat mai. A tawp dawn tak takah MPL a HOT hle a ni.
Round 13 match-ah hian Mizoram Police FC goal hnihte hi Lalnunmawia siam sak ve ve a ni a, man of the match-a thlan a ni nghe nghe. Goal hmasa ber hi 37th mins-a lut a ni a. Mual veilam sir atangin Lalnunmawia chuan ball chak takin an defensive third atangin a la phei a, V. Laltanpuia tan tha takin a siam sak a, ani hian a pet goal chhunzawm a.
Goal hnihna hi 40th mins-a lut a ni a, Rinpuia ball vawrh tha tak chu Luangmual FC defender ten an lo tauh pial a, he ball hi Lalnunmawia chuan changin, chak takin a tlan pui leh a, box veilama Lalfakawma tan a siam, ani hian laklawh awm miah lovin a lo pet goal a ni.
Second half hun tawp dawn minute 5 la awmin B Malsawmtluanga chuan Luangmual FC goal khat a khung a, Daniel-a cross tha zet chu box chhung hnai set sawt atangin Sawmtea chuan a pet a, Mizoram Police FC goalkeerper-in lo khawih mahse a dang chhuak zo lo, a goal ta a ni. Tichuan hun a tawp chuan 2-1 in Mizoram Police FC chuan hnehna an chang ta a ni.
MPL Round 14
27th November, 2015
Chanmari FC vs Luangmual FC
Mizoram Police FC vs Bethlehem Vengthlang FC
28th November, 2015
Dinthar FC vs Zo United FC
Aizawl FC vs Chanmari West FC