21 Nov 2020 10:56

bakteaJr.

Mizo tlangval

​Title lam kan ngaihtuah lo hrim hrim: Rodgers

Premier League hmahruai mektu Leicester City manager Brendan Rodgers chuan title lam an ngaihtuah loh thu leh an rilruah pawh a awm rih loh thu a sawia, an game tin chak zel phawt mai chu an thil tum a nih thu a sawi.

Khelh riat khelh tawhah Leicester hi vawi ruk chakin vawi hnih an tlawm tawha, point 18 hlawhchhuak tawhin, an hnuaia awm pahnih Tottenham leh Liverpool aiin point khatin an sang zawk.

Naktuk zanlai hian Leicester hian champion lai Liverpool chu Anfield-ah an tlawh dawna, an chak a nih chuan table lera an dinhmun an sawhnghet sauh dawn.

Leicester hi 2015-16 season khan Premier League-ah beisei loh tak maiin an champion a, tun season-a an bul tan dan hi, an champion season-a an bul tan dan aiin a tha zawk nghe nghe.

Rodgers chuan title lak chungchanga zawhna chhangin, “Ka rilruah pawh a la awm lova, game riat chiah kan la khel. Bul kan tan tha em em a, tuna pawimawh chu inngaitlawm tak chhunzawm zel a ni a, game tin atan theihtawp chhuaha kan inpuahchah a ngai. Chu chiah chu kan rilrua awm a ni,” a ti.

Leicester hmachhawn tur Liverpool hian player inhliam an ngah hle a, Leicester tan pawh point 3 hlawhchhuahna chance tha tak niin a lang. Rodgers chuan Liverpool chungchang sawiin, “Top-class player an nei nuala, keini pawh kan player pawimawh te an inhliama, mahse an aia khel te an khel tha thin hle a, Liverpool pawh chutiang tho chu an nih ka ring.

“Game hautak a ni dawna, player khel thei lo tur nei nual mahse, an squad-ah world-class player an la awm nual tho. Tha taka kan defend a ngai dawna, kan attack-in kan hriam hle a ngai dawn bawk. A tha ber tum kan chaka, chu chu Liverpool hi an ni,” a ti bawk.