11 Feb 2019 05:37

inkhel

Title la turin Liverpool an chak vek a ngai: Souness

Graeme Souness chuan Liverpool tan Premier League title la thei tur chuan khelh tur hmabak la awm zawng zawnga an chak vek a ngaih thu a sawi.

Jurgen Klopp leh a pawlte chu game 26 khelhah vawi khat chiah an la tlawm a, vawi 20 an chak tawh a. Heti chung hian Premier League title kawltu Manchester City chu hmahruaitu an ni leh tawh a, Liverpool hi pahnihnaah an awm mek a ni.

Liverpool star hlui Graeme Souness chuan, “Manchester City chuan awm mai mai an tum loh zia an lantir chiang a, 6-0 ngawtin Chelsea an sawp thei a. Liverpool tan chuan Premier League game khelh tur an la neih zawng zawnga chak vek a pawimawh a, chuti a nih loh chuan league title lak loh theih a ni dawn tlat,” a ti.

“Inrinnia Liverpool in Bournemouth an hneh dan kha chu sawi hluai tlak a ni lo a, chapo pui chi a ni miah lo. City in Chelsea an hneh dan erawh sawi hluai loh chi a ni lo thung a, tun season hmabak la awmah hlauh ngawih ngawih chi kan ni an tihna a ni ber,” a ti bawk.

A sawi zelnaah, “Khatiang taka Manchester City kha an che thei zel dawn a nih chuan title laksak an huphurhawm dawn viau a. Liverpool chuan an title kawl lai hi an la laksak thei a, mahse ka sawi tawh angin game khelh tur an la neih zawng zawnga an chak a ngai ngei dawn a ni,” a ti.

Souness ni lo, Liverpool player hlui tho Jamie Carragher pawh a tawng chhuak a, Klopp-a pawlte chuan City that zia lang chhuak chu khelmuala an chhan let ve ngei a ngai nia a hriat thu a sawi.

“Tun dinhmunah chuan champion tur ber a la chiang chuang lo a, City leh Liverpool te hi beiseiawm zual pahnih an ni a. Season tawp thlengin khawi team zawk hi nge tang mar thei dawn tih hi a pawimawh hle. Reds hian khelmualah title la thei an ni tih hi lantir chhoh zel a ngai a, chutiang an ti thei a, an hmaa dingte an hneh zel a ngai tawp mai a ni,” a ti.