10 Feb 2019 02:39

inkhel

​Title intlansiaka kan tel ringawt pawh hi hlawhtlinna a ni – Guardiola

Kum 2008 leh Kum 2009 khan Manchester United chuan a zawnin Premier League title an la a, hemi hnu hian a zawna Premier League title la an la awm leh lo.

Tunah hian Manchester City chu a zawna champion thei an la ni a, season liamtaa hneh taka Premier League title an lak hnuah tun season-ah champion tura rinkai ber an la ni fo. Khelh inang chiahah Liverpool lakah point thumin hnufual mahse game 10 chuang khelh tur a la awm a, City hi champion tura rinkai ber an ni mek a tih loh theih loh.

City manager Pep Guardiola chuan an champion zawh kuma title intlansiaka an tel leh thei nghal ringawt pawh hlawhtlinna a nih tawh sa thu a sawi. Guardiola chuan, “Kum nga emaw kum ruk kalta vel atang khan champion-te hi season lehah an dinhmun a tha lo thin hle a, an vai mai khan title intlansiakah an tel pha lo thin.

“A season dawt lehah Premier League-a champion thei zingah an tel lo thin a, mahse keini erawh kan tela, chu chu tun season-a min ti lawm tu ber pawh a ni. Miin tu emaw kan zuam sual anga an sawi hi thudik a ni lova, Carabao Cup pawh nise tumah kan zuam ngai lo. Chelsea pawh season thum liamta khan an champion a, chumi dawtah Leicester an ni leha, champion nawn theihna chance an nei ngai lova keini erawh chuan kan nei.

“A tawp thlengin kan bei dawn a, Sunday-a Chelsea kan hneh theih chuan a tawp thlengin intlansiakah kan tel thei tih ka chiang ang. Champion leh ngei turin a tawp thlengin kan bei dawn a ni,” a ti.