Jose Mourinho chuan title lak hnem lama Pep Guardiola a chungnung ta zawk chu eng vaka a ngaih loh thu sawiin, a club enkawl thlak kual vak lo se chuan tun aia tam daih hi title a lak tur thu a sawi.

Manchester City boss Pep Guardiola chuan tun season-ah Premier League title a la a, 2018-19 season chhungin Carabao Cup leh Community Shield pawh a lo la tawh bawk a. Heti hian a vaiin title 26 a la tling ta a, May 18 hian Wembley-ah Watford nen FA Cup final-ah an inhmachhawn leh dawn a, Manchester City hi an chak a nih chuan Guardiola chuan trophy 27 a la tling tawh dawn a ni.

Mourinho chuan club a enkawl chhungin trophy 25 chu a la tawh a, hei hi Guardiola chuan a khum ta chiah a. Nikum December thla khan Manchester United chuan Mourinho hi an ban a, hemi hnuah hian hna chelh a la nei zui leh rih lo a ni.

Portuguese coach Mourinho hian Portugal, Spain, Italy leh England velah club hrang hrang a lo enkawl tawh a, title a lak hnuhnun ber chu 2017 kha niin, Manchester United chu Europa League title a lakpui a ni.

Tun hnaia Guardiola-a’n title a lak hnem zawk takah chuan Mourinho hi a tawng chhuak a, a club enkawl thlak kual nasa viau lo se chuan tun ai hian title a lak hnem lehzual tur thu a sawi.

Jose Mourinho chuan, “Ka hun chhungin title 25 chu ka la tling ve tawh a, tuna kei aia Guardiola a chungnun zawk avang hian ka thin a rim chuang lo a, eng vakah ka ngai hran lo a. Title 25 ka la thei a ni tih ka hriat thar theih phah zawk a ni,” a ti.

“Porto leh Inter Milan te Champions League title ka lakpui khan khawi zawk zawkah emaw khan lo awm zui zel ila chuan European Super Cup, Club World Cup bakah national Super Cup te kan khel zui thei tur ania. Chuti a nih phei chuan ka title lak tawh zat chu 31 a tling thei tawh ngei dawn a ni,” a ti bawk.

A sawi zelnaah, “Ka club enkawl ka thlak kual nasat avangin ka title lak theih tur tam tak ka la ta lo a. A nihna takah chuan khatiang vel kha ka ngaipawimawh ber lem lo a, number-ah hian ka buai hran lo a ni ber,” a ti.