Title 100-na hi ka la thei kher lo maithei: Federer

01st November 2018, 12:11AM

Roger Federer chuan title 99 a la tawh a, title 100 la thei tur chuan Paris khawpuiah a champion a ngai dawn a, a kalkawngah Djokovic leh Nadal te a paltlang a ngai dawn a. Federer chuan title 100-na chu a lak theih kher a rin loh thu a sawi.

Swiss star Roger Federer chuan Basel khawpuia Swiss Indoors khelhah Marius Copil hnehin title a la zo chiah a, Paris lamah title dang beisei turin a inpuahchah leh mek a. A hun chhunga title 100 la thei tur chuan Paris-ah hian Rafael Nadal leh Novak Djokovic te a sut tlang a ngai dawn a ni.

Federer chuan title 100 la tling tura a kalkawng chu a khirh dawn tih a hriat chian thu sawiin, kum thum chhung a inlan tawh lohna hmunah hian a tel loh leh mai an rin laiin a tel theih tur thu hi a sawi a. 2011 khan kum 37-a upa Federer hi Paris-ah hian a lo champion tawh a, kuminah pawh champion leh theih ngei a tum hle.

A kum a tam chho ve tawh a, inkhelh pawh chawlhsan a hnaih ve dawn tan tawh a, tunhma angin a taksa pawh duhthusam a ni thei tawh lo a, tournament a hmachhawn zawhah chawlh hahdam a mamawh hnem ve tial tial tawh a. Tun hnai lawka tournament khel a nih avangin Roger hian ngai awh leh thei tur chuan a tam thei ang ber chawlh a mamawh a, Paris title la tur chuan World No. 3 hian World No. 1 leh World No. 2 te chu a hneh a ngai dawn a, a hmabak a hautak dawn hle a ni.

“Ka kalkawng hi a khirh dawn hle mai a, a nihna takah chuan title hi ka lak theih pawh ka ring ngam chiah lo a. Tournament ka khelh apiang chu title 100 ka lak theihna a ni zel tawh dawn a, mahse Rafa leh Djokovic te bakah player dang tam tak, thiam deuh deuh an awm teuh a, thil harsa tak a ni dawn chiang,” tiin Federer chuan a sawi.

World No. 1 Rafael Nadal chu Paris-ah hian a la champion miah lo a, Serbian star Djokovic erawh 2013, 2014 leh 2015 ah te khan a zawnin vawi thum a lo champion tawh a. Anni pathum hi seeded vek an ni a, round hmasa berah chuan an bye vek a ni.

Roger Federer chuan a khelh hmasak berah Jo-Wilfried Tsonga hnehtu, World No. 3 ni thin Milos Raonic chu a hmachhawn dawn a. A chak chho zel a nih chuan Wimbledon lama a lo hneh loh tawh Kevin Anderson nen pawh an intawng leh thei dawn bawk a ni.

Copyright © inkhel.com 2024. All rights reserved.