Spaniard defender Tiri chuan a lo khelh tawhna thin ATK chu a zawm dawna, Tiri leh ATK te hian inremna an nei vek tawh tih Goal chuan a tarlang.
Season liamta khan Tiri hi Jamshedpur FC tan a khela, season zawh ruala a contract a zawh ve avangin Jamshedpur hi a chhuahsan.
Tiri hi kumin February thla khan Kerala Blasters nen pre-contract ziak turin an inrem zeta, mahse Kerala lam hian coronavirus buaina avangin Tiri hi a hlawh tihniam tura an phut leh hnuhnawh avangin Tiri hian an inremna titawpin, Indian Super League champion lai ATK hi a zawm dawn ta zawk a ni.
Spaniard defender dang Agustin Iniguez chuan mimal thil avangin ATK a chhuahsan dawn avangin ATK hian ram dang mi defender an melh meka, remchangah la in an player hlui kum 28 mi Tiri hi an lalut dawn.
Kum 2016-a ISL-a ATK an champion khan Tiri hi ATK-ah a awm a, kum 2017 atang khan Jamshedpur tan a khel tana, a hma in Ateltico Madrid B team tan te pawh a lo khel tawh thin.
Tiri hi Spanish club Cadiz academy chhuak a ni a, Cadiz tan kum 2010 thleng khelin, Atletico Madrid chuan an B team-a khel turin an laluta, kum 2015 khan ATK a zawm. Kum 2016 khan Atletico B team tan a khel leh zuaia, hemi kum vek hian ATK zawm lehin, kum 2017 khan Spanish club Marbella a zawm zuaia, hemi kum hian Jamshedpur a pan ta a ni.