Tun hnaia Time in mi entawntlak zual 100 an thlan chhuah zingah Ninja a tel ve a, Tyler ‘Ninja’ Blevins hian hetianga a tel thei hi lawmawm a tih thu a sawi.
Tyler ‘Ninja’ Blevins hi Twitch streamer niin, YouTuber lar ber pawl a ni a, Fortnite game khel thin zingah chuan thiam filawr ber tia sawi a ni. Time magazine in khawvel puma mi entawntlak zual 100 an thlan chhuah zinga an thlang chhuak ve chu ropui a tih thu sawiin, a lawm zia chu sawi ngaihna pawh a hriat loh thu a sawi a ni.
Ninja hi Detroit khaw chhuak niin, Time list-a tel thei tur hian American football star Juju Smith-Schuster chuan a nominate a. Pittsburgh Steelers wide receiver JuJu Smith-Schuster bakah hip-hop star pahnih - Drake leh Travis Scott te chuan Ninja hi Fortnite Battle Royale an khelhpui thin a. Anni inkhel hi chu mi nuai 6 chuang zetin an thlir thin a ni.
Smith-Schuster chuan, “NFL ah ka tel thin a, hei vang hian mi ngaihsan hi ka neih vak an ring lo thin a. Mahse, nikum March thla khan Drake leh Travis Scott te nen a vawi khatna atan Fortnite game chu Ninja kan khelhpui a, a turu lutuk hi sawi ngaihna pawh ka hre lo,” a ti.
“Khawvel hmun hrang hranga mi maktaduai chuang zet mai, Ninja inkhel lai entu zingah ka tel ve a. Thla eng emaw zat chhung chu ni tin mai Ninja hian Fortnite a khel lai chu ka thlir thin a, hetiang lampangah kher hi chuan tluk pha tur hi an awm lo reng reng. Ninja thiam dan chu awihawm loh khawp a ni a, a thiam em avang hian ngaihsan loh theih a ni lo,” a ti bawk.
A sawi zelnaah, “Ninja ka ngaihsanna hi chu a ni telin a zual tial tial a ni ber a, tunah phei chuan gaming leh pop culture hi amahin a suih zawm mek a ni ber a. A thil tih lampangah chuan a chungnung chiang bawk a, han ngaihsan loh chi hi a ni lo reng reng,” a ti.
“Video game hi chu hman atangin ka atchilh em em reng a, tun thlengin ka la buaipui hle bawk a. Mi tam tak chuan naupangchhe thil tiin an sawi chhia a, hun khawhralna mai mai niin an sawi fo thin a. Ninja hian esports hi a chawisang chho ta hle a, tunah phei chuan mi ngaihsan rawn a ni chiang tawh hle a. Khawvel hmun hrang hrangah a dinhmun anga din theih hi an chak tawh viau hlawm a, gaming dinhmun chawisan kawngah a hmalakna te a fakawm hle a ni,” tiin Smith-Schuster chuan a sawi.