23 Sep 2020 05:52

inkhel

TIME 100 ah Lewis Hamilton a tel

Lewis Hamilton chu TIME magazine-in khawvela mi entawntlak zual 100 an tlan chhuah zingah a tel.

Formula 1 champion Lewis Hamilton hi TIME magazine-in kum tin an lo thlan chhuah thin, mi chi hrang hrang entawntlak zual an thlan chhuah zingah a tel pha a. He list-ah hian politician, musician, social activist, sport star te leh a dang chi hrang hrang an tel thin a ni.

British driver Hamilton hian chi inthliarna leh vun rawng vanga inhmuhsitna dona kawngah nasa takin hma a la a, intlansiakna lamah lah a che tha hle a, a langsar ber a ni chho zel a, hei vang hian TIME chuan an thlan chhuah ve phah a ni.

Mercedes driver hian kuminah Black Lives Matter tih chu F1 intlansiaknaah a vawrh lar hle a, TIME in an thlan chhuah ve avang hian NASCAR driver driver Bubba Wallace chuan chhuanawm a tih thu a sawi chhuak a ni.

Bubba Wallace chuan, “NASCAR huangah hian keimah chiah hi mihang driver ka ni a, Formula 1 huanga mihang driver awm chhun Lewis Hamilton an thlang chhuak ve hi lawmawm ka ti,” a ti.

“Mihang F1 driver an thlang hian thu tam tak a sawi a, keima tan pawh awmze thuk tak a nei chiang a. Khawvel hmuhah kan ding chhuak thei a ni tih a lantir chiang hlein ka hria a, Black Lives Matter pawh khawvel hmun hrang hrang hmuh atan a pho chhuak thei a ni,” a ti bawk.

A sawi zelnaah, “Lewis-a rilru put hmang, a chezia leh hma a lakna kawng hrang hrang ka thlir hian car intlansiaknaah chauh lo pawh kawng tam takah entawntlak a lo ni chiang hle tih ka hre thar leh thei a ni,” a ti.

TIME CEO leh editor-in-chief Edward Felsenthal chuan kumina an thlan chhuahte chu kum danga an thlan thinte nen an inang lo hle niin a sawi.

Lewis Hamilton hi TIME 100 list-ah hian vawi hnih a lang ve ta a. Kumina an thlan chhuah zingah hian kum dang aiin doctor leh nurse an lang hnem a, hmeichhia pawh 54 zet an lang a, hmeichhe lan hnem ber tum a la ni.